كتب: سما أحمد
خلال استضافته عبر برنامج الستات مايعرفوش يكدبوا المذاع على قناة CBC، وتقدمه الإعلاميتين (منى عبد الغني وإيمان عز الدين)، قال الفنان (محمد أبو داوود) إن أصعب موقف تعرض له في بداية حياته الفنية، كان عندما التقي المخرج (فايق إسماعيل) لأول مرة وحينها كان لا يزال حديث التخرج ويعمل مساعد مخرج إلى جانب التمثيل.
وشرح (محمد أبو داوود): (كنت أنا وصاحبي وزميلي (سمير حجاج) بنقعد في مراقبة المسلسلات عشان المخرج يشوفنا ويدينا دور، وفي يوم جه (سمير) وقال لي إن الحاج (فايق إسماعيل) المخرج بيزعق لنجم كبير وكان الحاج (فايق) معروف إنه عصبي جداً، وقتها قلت لو اشتغلت معاه وعمل معايا كده مش هسكت).
وأضاف (محمد أبو داوود): وتشاء الأقدار أن أول عمل ليا كان من إخراج (فايق إسماعيل)، وكنت بعمل دور السكرتير قدام الأستاذ (يحيى شاهين)، ومن التوتر بقيت طول اليوم أطلع الورقة أقرأ واحطها في جيبي وبعدين أحس إني نسيت الكلام، فاطلعها تاني وفضلت على الحال ده طول الوقت).
وأوضح (محمد أبو داوود) تفاصيل المشهد الذي كاد يسبب له أزمة كبيرة قائلاً: (المشهد كان لازم أقف على طرف المكتب عشان أبان، وبدأنا نصور.. أول مرة والتانية والتالتة المشهد مكنش بيكمل، والمخرج فايق إسماعيل بدأ يزعق بصوت عالي، فتوترت أكتر).
وأشار (محمد أبو داوود): إلى إنه في المرة الرابعة تمكن من تأدية المشهد بإتقان شديد وبراعة، مؤكدا: (كنت حاسس إن اللقطة دي ممكن تنهي مستقبلي تماماً، ولما جينا نعيد المشهد كان الأستاذ يحيى شاهين المفروض يقول جملته اتفضل يا فهمي، عشان آخد الشنطة وامشي..
لكنه نسي الجملة وقتها اتوترت جدا، لكن المفاجأة كانت في إن المخرج فايق إسماعيل قال قدام الكل (محمد أبو داوود) من الممثلين الجامدين أوي وده كان أهم وأصعب موقف في حياتي في نفس الوقت.
مساعد لفؤاد المهندس
من ناحية أخرى صرح الفنان (محمد أبو داوود) بكواليس مثيرة عن فيلم (برشامة) الذي يشارك في تصويره حالياً إلى جانب الفنان (هشام ماجد)، ومن المقرر أن يتم عرض الفيلم في الفترة المقبلة، مشيرا إلى أن الاسم مستوحى من مفهوم الغش في الامتحانات، قائلًا: (الاسم متاخد من برشامة الامتحانات، وأنا أؤدي دور مدير المدرسة اللي بيحاول يضبط العملية).
وأوضح (محمد أبو داوود): خلال استضافته عبر برنامج (الستات مايعرفوش يكدبوا) أنه خلال تجربته مع النجم (نور الشريف) في فيلم (أيام الغضب) كان يقوم بالتصوير بذراع واحد لأنه كان يؤدي دور أحد مصابي الحرب، مؤكدًا أن هذه الفترة من أهم مراحل حياته الفنية.
وأشار (محمد أبو داوود) إلى أنه كان يعمل مساعد مخرج مع الأستاذ (فؤاد المهندس) في مسرحية (قسمتي)، وخلال هذا العمل جمعته علاقة قوية بالأستاذ، وحينها قال له الفنان القدير فؤاد المهندس إنه أحسن مساعد مخرج في مصر.