بقلم الشاعر الكبير: إبراهيم رضوان
كتبت في أربع حلقات طوال الأسبوعين الماضيين، كيف بدأت علاقتي بالفنان الكبير (سامح الصريطي)، عندما كان يجلس معنا على كافتيريا (سوق الحميدية) بباب اللوق في بداية مشوار الفني، عندما قدم لي نفسه على أنه مطرب، وسرعان ما توطدت علاقة الصداقة بيننا، بعدما طلب مني كتابة سكتشات غنائية بسيطة لم أتحمس لها.
رأيت فيه فنانا بشوشا على درجة عالية من الثقافة والرقي في أخلاقه وصفاته.. حتى دخل قلبي من أوسع الأبواب خاصة أن طموحه كان كبيرا بحجم الكرة الأرضية، ومرت الأيام والليالي التي قضيناها في أحاديث متنوعة عن الفن والثقافة والسياسة التي كان ينزع لها قبل احترافه العمل التمثيلي.
واقترب مني (سامح الصريطي) حتى دخلنا سويا في صداقة عائلية، وبعد أسابيع قليلة لمحت الحظ يبتسم له – وعندما يبتسم الحظ تتغير مسيرة الإنسان 1000 درجة – حيث أخبرته المخرجة (إنعام محمد علي) ذات صباح أن المخرج محمد فاضل يسأل عنه.
تعجب (سامح الصريطي) مترددا.. نصحته أن يسارع بالذهاب إليه في نفس الليلة.. قال له فاضل: (إحنا بنعد مسلسل) اسمه (رمضان والناس).. واخترتك لأداء دور في المسلسل.. المهم تسلم (سامح الصريطي) المسلسل، قائلا لي: (احتمال يكون لى مشهد أو اثنين.. بس حد طايل يقف قدام محمود مرسي؟).
انصرف (سامح الصريطي) من الكافتيريا قبل موعده المعتاد ليعايش أحداث المسلسل.. في اليوم التالى.. تقابلنا لأطمئن منه على مساحة الدور الذي سيقوم به.. قال لى بسعادة بالغة مندهشا: (دور إيه.. دى طلعت بطولة).
ومن بعدها انطلق كالصاروخ في سماء التمثيل لنقترب أكثر وأكثر، وتكررت سهراتنا ولقائاتنا حتى تعرفت على أصدقائه ومعارفه في الوسط الفني، فاكتشف طيبة قلبه ونقاء سريرته، واختفت فكرة الغناء من رأسه حتى فاجأني بإعادة طلبه بالغناء من خلال مسرحية (عالم كورة كوروة)، وكتبت بالفعل عدة أغنيات أنشرها لأول مرة على النحو التالي:
أغنيات من مسرحية (عالم كورة كورة)
أوقات يكون صوت الطوفان
أخضر.. بلون قلب الحياة
أوقات يكون زي الفيران
مش عارفه فين الاتجاه
ما تهدوا صوت المعمعة
ملينا لحن السرسعة
يا هل ترى.. مين اللي جاي
سبع السباع.. أم ضفدعة
إيه اللي أصابك يا زمان
إيه اللي خلى العقل تاه
أوقات يكون صوت الطوفان
اخضر بلون قلب الحياة
……………………..
قالوا العقل السليم
جوه الجسم السليم
بس الكلام ده فعلا
كان في العهد القديم
يا كابتن الكباتن
يا أصل العنطزة
يا غريق في بحور المفاتن
هو الدخان غذا؟
اهديهم يا كريم
قالوا العقل السليم
جوه الجسم السليم
……………………..
إدي اديله.. إدي اديله
اكسر ايده.. واقطع ديله
دشدش عضمه.. دغدغ أدمه
وابعث له النقالة تشيله
إدي اديله.. إدي اديله
إدي اديله.. إدي اديله
عايز تكسر راسه و ماله
اللي يفوت هيموت.. وان فات
أجري وشده من سرواله
إدي اديله.. إدي اديله
……………………..
لو تعرفوا
شجر الهوا في القلب طالع قد إيه.. لو تعرفوا
لو تعرفوا طعم الغرام..
هتلحنوا.. وتألفوا
يا ناس يا هوه
لو تعرفوا الحب الحقيقي وتعيشوه
هاتصيبكوا أمراض الهوى
وهترتفع حرارتكوا.. وتعوزوا الدوا
وضروري زي العاشقين.. هاتخرفوا
لو تعرفوا
شجر الهوا في القلب طالع قد ايه .. لو تعرفوا
……………………..
على مهلك يا قدر
ما بقتش عارفه حتى.. الضلمة من القمر
ما بقتش عارفه حتى.. الميه من الحجر
على مهلك يا قدر
الخلطبيطة.. زادت
وبحور الجهل فاضت
والبومة السوداء باضت
على النجمة.. والشجر
صبح الطريق خطر
واتقطع الوتر
على مهلك يا قدر
على مهلك يا قدر
……………………..
في كل يوم الثرثره (والنأورة)
بتاخدنا خطوه لورا (نرجع ورا)
رايحين لفين.. من غير قمر
من غير تاريخ.. ولا تذكره
هنعدي بس ازاي يا ناس
واحنا حرقنا القنطرة
شاطرين في قعدات السكوت
وان قولنا.. ننطق كركرة
في كل يوم الثرثرة (والنأورة)
بتاخدنا خطوه لورا (نرجع ورا)
……………………..
الجد أيامه انتهت
كل السهام اتوجهت.. على مخنا
غول السهولة طخنا
ووقعنا في بحر المهازل والخنوع
وهتفنا في وسط الجموع
زي الجموع ما بيهتفوا
سقفنا.. زي ما سقفوا
شلفطنا كل حاجه ظلمنا.. أو هزمنا لخصمنا
ننطق باسم النادي لما نتسأل على اسمنا
والله يا كل الفرق
لازم هتقعي في فخنا
الجد أيامه انتهت
كل السهام اتوجهت على مخنا
……………………..
يا جيل هيجي فوق حصان التجربة
اوعى تسامح جيل قديم
ألف كتب على المهيصة والطبطبة
اوعى تسامح جيل قديم
اهتم بالكورة.. ولا اهتمش يجيب
دفة عشان المركبة
يا جيل هيجي فوق حصان التجربة
خرجت ولم تعد
وحشانا يا صبية
العالم هو هو
والدنيا هيّ هيّ
آه يا اولاد الحلال
ما تجاوبوا على السؤال
راحت فين الهنية
ام الضحكه الحلال
……………………..
خرجت ولم تعد
والخوف عليها زايد
وبرغم الحزن لسه
بحر التفاهه فايض
وما عادش فيه قضية
ايه يا أولاد الحلال
ما تجاوبوا على السؤال
راحت فين البنية
أم الضحكة الحلال
……………………..
خرجت ولم تعد
والدنيا في انتظارها
عطشان يا قمح.. بكره
هاينعشك مطرها
وتعود بعيون بهية بضحكها وسهرها
آه يا ولاد الحلال
ما تجاوبوا على السؤال
راحت فين البنية
أم الضحكه الحلال
……………………..
من يوم ما كان جوه اللفة
وانتى قمر لي يا لقطة
غايب عريسنا عن الزفة
يا خوفي نخسر في النقطه
ما جاش عريسنا؟ لسه ما جاش
يمكن يكون ضاع في الزحمه
قلب البشر اصبح غشاش
من ايه ؟ عدم أكل اللحمة
أيوه النصيب غلاب جدا
يظهر ما فيش فايدة يا عيني
الديك خلاص قرب يدن
وعريسنا مش راجع تاني
ما جاش عريسنا؟.. لسه ما جاش
يمكن يكون ضاع في الزحمة
قلب البشر أصبح غشاش
من ايه؟.. عدم أكل اللحمة
……………………..
ما تموت بقى.. ما تموت بقى
كملت.. واتحلت وياك الخطاوي الضيقة
وحاولت أصحح بصتك
انصت اليك.. وانت بتحكي بكدب ليا قصتك
مع ان عيشتك م البداية سيئة
ما تموت بقى.. ما تموت بقى
من قبل ما تخلف ولد
يورث في لحظه تخلفك
كان نفسي اقدر انسفك
وامحي وجودك من الوجود
في الجد.. بتكون السكوت
في اللعب.. بتكون الرعود
يا عذابي.. يا جبال الشقا
ما تموت بقى.. ما تموت بقى
موتك أكيد..
هيكون إضافة للحياة
هتكون نضافة للحياة
يا اللي زرعت لكل فكرة عظيمة خضراء مشنقة
ما تموت بقى.. ما تموت بقى
الصبر فاض.. نطق السكوت
لازم تموت.. لازم تموت
لازم هيرجع للبيوت
صوت الأذان.. والزقزقة
ما تموت بقى.. ما تموت بقى
من كتاب (مدد.. مدد)
سيرة ذاتية لبلد