بقلم الكاتب الصحفي: محمد شمروخ
وربنا.. أنا في الأول افتكرت (يلا ياسحل) اسم مسلسل، لكن لما فوجئت إنها مكتوبة في نفس المكان من الشاشة، بس على قناة تانية، ساعتها خمنت إنها إعلان لشركة عقارات متخصصة في بيع فيلل وشاليهات في الساحل الشمالي، لحد ما تأكدت أنها شعار لمبادرة بنفس الاسم لدعوة لزيارة الساحل الشمالي والاستمتاع بمباهج الحياة هناك لكل المصريين.
الله أكبر.. الله أكبر .. مرة واحدة كده دعوة لكل المصريين من أعلى المستويات وإلى أدنى البيئات، يعنى من أول مدينتي ولغاية عزبة حرنكش، حيث سترى بعينيك مجتمع إيجيبت بكل ما له وما فيه من ألوان الجمال والأناقه والمتعة والانطلاق، خاصة عندما تصافح عيونكم المياه الفيروزية الرايقة، مع أول كسرة شمال عند دخلة الساحل.
واستمتع بحياتك، حفلات إيه ومطاعم إيه، وهناك تقابل نجوم مصر من النمبرات الأولانية في كل المجالات، الرياضة والفن والسياسة، والاقتصاد، ورجال الأعمال، وغسيل الأموال.. وهناك ولا يهمك.. الصرف عالى والفرتكة على ودنه.. لأن الكل هنا من كبارات البلد اللي رايحين علشان يرفهوا عن أولادهم من تعب وشقا السنة كلها خصوصاً خدمة الشعب ليل نهار.. (وياريت عاجب😩).
هم برضك.. مش من حقهم يرفهوا عن نفسهم كام يوم في خنقة الحر ده؟!
وكتر خيرهم هم كمان، ماهى البلد بلدنا زي ما بلدهم..، لأنهم خلوا من حقنا إننا نروح نتفرج عليهم وهم بياكلوا الكافيار الأحمر أبو خمسين ألف من غير لا سلطات ولا ميه ولا بابا غنوج ولا حتى علبة مناديل فيها مندلين على بعض فوق الترابيزة’.
(يلا ساحل) شعار علشانك وعلشانى.. ونروح بقى نشوف شكلها إيه قزازة الميه أم 600 جنيه ولا كوباية الشاي فتلة أم ألف وميتين.
وأكيد هيوصلنا سماعات حفلة (شيرين بتاعة تذاكر إللي بنص مليوناية ع الترابيزة المدورة).
بس خليك صريح ووضح أن نص مليون جنيه مصري يوازي فقط عشرتلاف دولار إلا كسر.. يعنى ما يعيشوش واحد منهم مع عيلته أو صاحبته، ولا حتى ليلة في جناح يرى البحر بفندق قريب من العلمين ولا جنب مراسي، وبالفطار بس!
وبعدين بلاش غل ونق ع الفاضي، لأن (اللى ما يعرفش يقول عدس).
شعار (يلا ساحل) على كل قنوات الدولة
والسر بقى بتاع شعار (يلا ساحل) على كل قنوات الدولة، يقصدوا يقولوا إنكم تروحوا تشوفوا بعينيكم (ما يكابده كبارات البلد من أجل أن يدخلوا السعادة على أولادهم وصحابهم وصاحباتهم الصغيرين، لأنهم – إن كان عليهم – فهم لا يهتمون بالمتعة ولا يقيمون وزناً للترفيه لأنفسهم.
لأن الواحد منهم ينقل معه كل هموم أعماله، وطول النهار والليل معلق الموبايل على ودنه أوامر ونواهي وتعليمات وصفقات بورصات، وعصبيات ونرفزات.
وكل حرق الدم ده لازم ينسيهم مباهج الحياة على الساحل (الإيجيبتاوي).
يا ناس حرام عليكم.. الدنيا صعبة على الباشوات الكبارات.. عارفين يعنى إيه واحد يدبر تسعتاشر ولا تسعة وعشرين مليون وسبعمائة ألف وثلاثمائة وتسعة جنيهات وخمسين قرش وتلاتة مليم فقط لاغير، علشان يصرفهم على ولاده، فطار وغدا وعشا، فول وبيض وجبنة ركفور وسمك وجمبرى وكافيار أسود وكافيار أحمر وباتون ساليه وزبادى مزارع، وقزايز معدنية وتذاكر لعمرو وشيرين؟!
عارف يعني إيه واحد مرتبه في الشهر يادوبك 7 ولا 8 مليون في شريط القبض، نصهم رايحين على دروس العيال والهيرو والكوك، قد إيه صعب عليه يدبر تسعتاشر ولا تسعة وعشرين مليون وسبعمائة ألف وثلاثمائة وتسعة جنيهات وخمسين قرش وتلاتة مليم فقط لاغير.. بدون تكاليف السفر؟!
وبعدين مديره في الشغل محرج عليه شغلانة بعد الضهر، ولولا إيراد الخمس مزارع، على الفندقين، على التلاتين كافيه ومطعم، على نصيبه من مكسب كشك سجاير حودة البواب شريكه، كلهم كلهم.. رايحين على الساحل في ضربة واحدة.
بالذمة مش حرام؟!😭
عربية سيكا السواق ع البوابة
يا عالم بلاش ظلم لأن (يلا ساحل) قصدهم إنكم تعرفوا بس (الهاي ليفيت عايشين إزاي في الإيجيبت).
بس أنت متخافش من حد.. اتفق مع جيرانك وأجروا ميكروباظ الواد سيكا ابن حودة البواب، واطلعوا ع الساحل الشمالي ولا يهمكم، هم سايبين خبر بنمرة عربية سيكا السواق ع البوابة.. وما تقلقوش.. هتنزلوا البحر عادى.. وكمان بالجلاليب علشان ولاد الباشوات يتفرجوا عليكم ويعرفوا بتعيشوها إزاي ويتأكدوا إن فيه بنى أدمين بجد.. عايشينها كده وبياكلوا ويشربوا ويمشوها بتلتلاف ونص في الشهر.
لا لا لا.. بلاش سواد قلوب.. الدعوة دى لا هى استهزاء ولا انفصام عن الواقع.. الدعوة بجد.. وجد الجد كمان.
(يلا ساحل) بقى وبلاش نتانة وعيشوا اليومين.. روحوا بسرعة لحودة البواب في الكشك علشان يتفق لكم مع ابنه الولا سيكا السواق وهو هيكرمكم آخر كرم.. والباشا موصيه يتساهل في الأجرة.. لأن الميكروباظ تبع الباشا برضه😲.
(يلا ساحل) بقى ما تكسلوش وأوعوا تنسوا تاخدوا قزابز الميه والشيبسي وكانزات البيبس من كشك حودة وبالمناسبة فيه تخفيضات 10% على المعدنيات والشباسي والدلاسي والبباسي، ولو احتجتم حاجة في الطريق حودوا على أي كشك وهيتعمل معاكم واجب صح برضه.. بس ماتنسوش تقولوا إنكم من طرف حوده البواب!