كتب : أحمد السماحي
حتى تمنع القيل والقال، وتخرس كل الألسنة التى تتقول عليها، أو تنسب لها آراء من وقت لآخر، خاصة بعد انتشار الصفحات التي انتحلت صفتها خلال السنوات الماضية، وسببت لها صداعا شديدا، أطلت الفنانة المعتزلة (حنان ترك) في الساعات الماضية على جمهورها، بعد غياب طويل، في بث مباشر، عبر صفحتها الرسمية على موقع التواصل الاجتماعي الـ (فيس بوك)، وذلك للإعلان عن صفحتها الرسمية التى قامت بتوثيقها.
وقالت حنان ترك : (أنا مش هسكت على اللي كان بينتحل صفتي على الفيس بوك، يا إما يشيل أي منشور كان بيتكلم فيه باسمي، يا هاخد إجراءات قانونية ضده، أنا وثقت صفحتي الرسمية خلاص، وأنشأت قناة خاصة على موقع الفيديوهات الشهير الـ (يوتيوب)، وهتواصل مع جمهوري من خلالهما، بدل ما الجمهور يصدق أكاذيب عني في حتت تانية، وللأسف أنا وقتي ضيق، عشان أنا في غربة، وولادي مسؤولين مني، لكن هلاقي وقت هكون معاكم.
وأضافت حنان ترك: ممكن أطلع لايف معاكم كل شوية وأجاوب على أسئلتكم، وممكن أقولكم حكايات عني وأولادي، واعتذرت لجمهورها عن الأداء الذي ظهرت به في أول بث مباشر لها على فيس بوك، قائلة: أنا جاهلة في موضوع السوشيال ميديا، معلش الموضوع جديد عليا في اللايفات.
واستطردت حنان ترك: عاوزاكم تساعدوني، على أي حد يتكلم باسمي، تبقوا واقفين له، انتم عارفين كويس ممكن (حنان) تقول إيه ومتقولش إيه.. كان فيه صفحات كتير بتنتحل اسمي، وتتكلم باسم الدين والسياسة وحاجات غريبة جدًا أنا ماليش علاقة بيها، ولا عمري هنزل منشورات بالشكل ده، وده لأن أنا سياسًا جاهلة جدًا وليس لدي وعي سياسي إطلاقًا إن أنصح حد، وأن أنظر سياسيا، وبالنسبة للدين، بقول من وقت ما اتحجبت عام 2007: أنا درست علوم شرعية على سبيل النجاة وليس الدعاة، الدعوة دي كبيرة جدا، الدعوة في سبيل الله ده موضوع كبير جدا محتاج علم وفقة، مش أي حد يقدر يعملها، أنا فين والكلام الكبير ده فين؟!
