بقلم النجمة الكبيرة : فريدة سيف النصر
من يوم ما ستي ماتت أول مرة أحس بالأمان .. مش خايفه ولا عايزة نور .. حضن أبويا بالدنيا كلها .. أول مرة يطبطب على راسي وقال ضفايرك فين يالوزة .. شعرك حلو زي شعر آمك خسارة .. أتعجبت هو بابا ماخدش باله هناك .. ماحبيتش أنيمه زعلان ماحكيتش حاجة وقررت أنسي وماحكيلوش مش عايزاه يزعل أبدا كفايه بقي انه ساب مراته (ت) علشاني .. نمنا صحيت علي صوت الديك بيأذن .. قبل الفجر وبابا قام يتوضي معرفش ليه شوفت ستي بتديني طرحتها وبتقومني تصلي .. جريت على أبويا وقولت له عايزه أصلي .. قال لي بتعرفي قولت له مامتك علمتني .. وكنت باصلي لكن من ساعة ماروحت عند الخالة ( س) ماصليتش أقول له ولا بلاش..بلاش.
صلينا وقاللي البسي حاجه تقيلة من هدومك وراح لافف راسي ورقبتي بشاله ونزلنا، الدنيا في مصر حلوة .. وحشتني زحمه الحي ده بحبها .. الناس صاحيه علي طول رايحين جايين وريحة بخور في كل دكان كل المنطقه .. دكاكين وحشتني ستي ووحشني الخروج معاها .. كنا ننزل نجيب اللي محتاجينه أنا فاكراكي ياستي ياحبيبتي .. بابا قاللي تحبي نجيب ايه للفطار قولت له أي حاجة تحبها .. كل مانعدي علي دكان حمدالله علي السلامه يامحمد أفندي .. ايه ده هى العروسه الحلوة دي لوزة .. كبرتي ماشاءالله .. ونفس الكلام بقي كل دكان.
ودخلنا عند البقال..أبويا اشتري من كل حاجه واحنا راجعين عالبيت أبويا نده عليه راجل وشه أبيض منور كده وله دقن طلع من دكان كله موبيليا .. ماهو الحي معظمه ورش نجارة. . قال يامحمد أفندي انت فين ياراجل من زمان .. أبويا قال في الدنيا ياعم الشيخ (ح) .. الراجل قال وانتي يالوزة كنتي فين بعد الست أم محمد ماتوفاها الله والبيت اتقفل .. والله البيت كله بقى ريحو تقيل الله .. يرحمها كانت ست ماتتعوضش (لوزة عينيها دمعت وأبوها قال لها لو عيطنا تزعل ياللا نقرا لها الفاتحه) .. وقريناها والشيخ (ح) كمل لبابا.
أنا سمعت عن شحنة الخشب بتاعتك وزعلت لازم تجيبها يامحمد أفندي مافيش حاجه ماتنفعش وأهو نص العمي ولا العمي كله .. بابا قال ربنا يسهل والشيخ (ح) قال له هاعدي عليك بعد ما اقفل نتكلم ياه يا ابن الغاليين بقالي سنين ماشفتكش .. نسيت أقول لكم انهم جيران ستي طيبين ودايما كانوا يدخلوا عند بعض هى ومرات الشيخ وبنتها (ف) .. ستي كانت تحب تعمل حلو وتوزع علي جيرانها.. روحنا البيت وقعدنا أنا وبابا نحاول نروق وننظف ونشيل الحاجات المفروشه عالعفش بس .. ماعرفش كنا محتاسين خالص الله يرحمك ياستي .. وخدنا استراحه ونص العفش عالسلم والسجاد وأنا طلعت مقلب مش قادرة أشيل .. ووقعت وأنا بننقل كرسي .. وقعدنا نضحك أنا وبابا وقاللي أنا وانتي مش نافعين عايزين حد يساعد.
وعملنا سندويتشين ولسه هاناكل لقينا الشيخ (ح) قدامنا طلع السلم وهو بيضحك علي كلامنا سمعنا .. وقال لبابا وهو بيفتح باب بيته قدام بابنا.. ده كلام يا ابن الغاليين تأكل لوزة ساندويتشات .. طيب ده احنا كنا بناكل الحلو كله من ايدين والدتك على حس لوزة .. كانت بتعمل لها اللي مايخطرش عالبال .. لوزة سرحت تاني ودمعت وقالت لنفسها ياريت مايجيبش سيرة ستي حرام عليه بيموتني وأنا عامله نفسي ناسيه .. ولقيناه بينده على اللي جوه شقته يا أم (ف) ويا (ف) تعالوا شوفوا مين هنا .. وهات يا أحضان منهم الاتنين وبوس فيا كنتي فين يالوزة لكي وحشة وكبرتي أو وطولتي .. وسلامات يامحمد افندي.
أنابصيت علي محمد أفندي أبويا لقيته متنح لـ (ف) والست (ف) متنحه لأبويا والشيخ قطع الحالة وقال ياللا على الأكل عندنا ناكل سوا (ف) عاملة ملوخيه ورقاق متقولش لعدوك .. أنا بقي بطني وجعتني .. أنا عارفه انها من زمان حلوة وبتطبخ وستي كانت بتحبها أوي يعني ايه بقي؟.. أبويا لسه متنح .. الشيخ قال ناكل و (ف) تاخد أم كامل الشغاله ويخشوا يقلبوا البيت في ساعه نكون شربنا القهوه واتكلمنا في موضوع الخشب .. وأا كنت باسمعهم وقاعده في حجر أبويا زي اللزقه وللحق خلصوا البيت بسرعة .. وكان أبويا خلص كلامه عن الشغل وهايديه الخشب.
دخلت أم (ف) وجابت الحلو وقالت لبابا عقبال ماناكل الحلو وانت عريس ولوزة عروسه .. طول عمري أنا ووالدتك كان نفسنا نبقي نسايب انما النصيب بقي ومراتك فين ياسي محمد؟ .. ابويا قال طلقت .. امي قالت لي انها مابقتش عارفة تعيط .. طيب سيبولي أبويا شهر واحد .. لوزة الصغيرة زكيه فهمت ان دي العروسه الجديدة أكيد .. لأن أبوها فضل متنح والست (ف) شرحة، دخلنا الشقه ايه الجمال ده حولتها لجنه .. فل فل فل .. والسيد بابا بيصفر وبيغني جفنه علم الغزل .. دخل رمي نفسه عالسرير وقال لي تعالي يالوزة .. أنا قولت نعم ياسي بابا أفندي .. قال لي ايه رأيك يالوزة .. روحت مقاطعاه .. قولت في ايه يابابا الملوخيه ولا الرقاق ولا التنظيف..قال لي كله كله يالوزه ..وجايين ننام الباب خبط جامد .. قام أبويا لقا (ف) بتقول له الحقنا ياسي محمد أفندي..