كتبت: سما أحمد
قالت الفنانة (حنان مطاوع) في لقاء مع منى الشاذلي، في برنامج (معكم منى الشاذلي): (بعض المصورين اللي عايزين ينزلوا على صفحات معينة وياخدوا ريتش، لا دول صحفيين، إني بدين للصحافة بكتير مما وصلت إليه، بيدفعوني ويكتبوا عني كلام كويس وبينوروا الأعمال اللي أنا فيها، وهكذا المصورين)
كانت كشفت الفنانة (حنان مطاوع) عن تفاصيل الموقف المزعج الذي تعرضت له مؤخرًا أثناء ذهابها مع ابنتها (أماليا) وعدد من صديقاتها الأمهات لحضور فيلم للأطفال داخل أحد المولات، مشيرة إلى أنها فوجئت بعدد من المصورين والجمهور يلتقطون لها الصور دون استئذان، ما تسبب لها في حالة من الارتباك الشديد.
أشارت (حنان مطاوع) إلى أنها ترفض تصوير ابنتها ليس لأنها تخشى الحسد، بل لأنها لا ترغب في سرقة طفولتها، أو أن تأخذ حق لا يحق لها، مضيفة: (ممكن بعد شوية تقولي عايزة أبقى مطربة وتنزل صورها، هي حرة.. وممكن تقولي أنا مش عايزة ده، أنا مستنية يبقى عندها قرار في حياتها تاخده هى).
لفتت (حنان مطاوع) إلى أن تلك الخروجة التي تم تصوير ابنتها فيها، تخرج مثلها يوميا من أجل التمارين وغيرها من الأنشطة، مؤكدة أنها لم تتعرض لمثل ذلك الموقف، مردفة (كنت رايحة السينما في المول، حفلة الساعة سبعة إلا ربع، وجارية عشان ألحق الفيلم، وفجأة لقيت الموبايلات طالعة في وشي وبيصوروني، وأنا مش فاهمة ليه ولا إزاي، وكنت في حالة بانك بجد، مش عارفة أتصرف).
أكدت (حنان مطاوع) أنها شعرت بالخطر على طفلتها وسط الزحام والتصوير العشوائي، مضيفة: (كنت خايفة يحصل لبنتي بانك، وخايفة كمان أحرج الأمهات اللي كانوا معانا، إحنا كنا خارجين كأي خروجة عادية).
أضافت (حنان مطاوع): (أنا لما بروح مهرجان أو فعالية فنية ببقى تحت أمر المصورين، لكن وأنا ماما في خروجة عادية دي مساحة شخصية.. وأنا طالعة لقيت نفس الناس بالموبايلات، وهاجمين مش سايبين شبرين بينا، وإيه القرب قوي كده وإيه الجمال أنك تمشي مع حد مش عايز يتشرف، وفين الشرف في أنك تسرق لحظة.. حطوني في حالة من البانك وعدم الارتياح).
من ناحية أخرى، كشفت الفنانة حنان مطاوع عن استعدادها لتقديم شخصية الملكة الفرعونية (حتشبسوت) في عمل مسرحي جديد، مؤكدة أن المشروع لا يزال في مرحلة التحضير ولم يتم التعاقد الرسمي بعد، رغم اكتمال النص.
أكدن (حنان مطاوع): (فعلاً اتعرض عليا دور حتشبسوت، وإحنا شغالين على مسرحية حتشبسوت، وآمل إنها تتعرض على المسرح القومي المصري، بس لسه ما تمش التعاقد لا مع المؤلف ولا المخرج ولا معايا.. وبالفعل فيه نص مكتمل دلوقتي، لكن أنا كنت حابة الأخبار ما تتنشرش قبل ما يتم كل حاجة رسمي، لحد ما أستاذ أنور عبد المغيث أعلن عن المشروع).
وعبّرت (حنان مطاوع) عن فخرها الكبير بالحراك الثقافي الذي تشهده مصر حاليًا، قائلة: (أنا فخورة جدًا إن دولتنا العظيمة منتبهة وبتحاول تنوّر وتعيد تقديم حضارتها للعالم، افتتاح المتحف المصري الكبير حدث جلل بالنسبة لي، زيه زي موكب المومياوات، كنت حاسة بفخر لا بعده ولا قبله.. إحنا بنقدّم تاريخنا بشكل معاصر ومنضبط، وبنوري العالم مين كان المصري ومين هو المصري الحالي).
في سياق آخر، كشفت (حنان مطاوع) عن مشاعرها تجاه استخدام تقنيات الذكاء الاصطناعي في إنتاج مقاطع تُظهر الفنانين الراحلين وكأنهم يعودون إلى الحياة، مؤكدة أنها تلقت صدمة مزدوجة خلال أسبوع واحد، بدأت بتزييف صورها على غلاف مجلة مرموقة، ثم بظهورها المفاجئ في فيديو يجسّدها مع والدها الراحل الفنان كرم مطاوع دون علمها.
خصوصيتها قد انتُهكت
أردفت: (قبل ما أحكي عن الفيديو، حصلت حاجة قبلها بأسبوع.. مجلة كبيرة كنت هطلع على غلافها، وبعد ما بعت لهم الصور فوجئت بصورة مش أنا، لبس ما لبستوش في حياتي، يعني تجاوزوني تمامًا، وعملوا فوتوشوب كامل على جسمي ووشي).
أضافت أنها شعرت حينها بأن خصوصيتها قد انتُهكت: (قلت لهم دي مش أنا، وده مش شرف مهنة.. دي سرقة، أنتوا سرقتوني وسرقتوا لحظة مني)، وأوضحت أنها بعد أيام قليلة فوجئت بتداول فيديو بتقنيات الذكاء الاصطناعي يُظهرها في مشهد تمثيلي مع والدها الراحل.
تابعت(حنان مطاوع): (ما عنديش شك إن الولد اللي عمل الفيديو كانت نيته طيبة، وكان بيحب الفنانين الكبار، بس أنا لما شوفت نفسي مع بابا حسّيت إن الألم اتجسد تاني.. مش كل الناس عندها القدرة تشوف أهلها اللي فقدتهم بتقنية كده، ممكن ده يوجعني أوي، ممكن يخليني أنهار).
أكدت رفضها لاستخدام الذكاء الاصطناعي دون إذن مسبق: (اللي حصل معايا خلىّني أفكر.. طب ماذا لو حطني في عمل ضد معتقداتي أو ضد أفكاري؟ لازم يبقى في قانون يمنع استخدام صور أو أصوات الفنانين إلا بموافقة مكتوبة، علشان نحمي نفسنا من أي تجاوز).