بقلم الشاعر الكبير: إبراهيم رضوان
لم يكن في شقة الأستاذ كمال الطويل (ريسبشن) بل حجرة متواضعة، كل شئ فيها كلاسيك وجميل مثل صالون أبيسون صغير، ومنضدة يضع عليها بعض الصحف والمجلات التي كان يتخلص منها بمجرد وصول القهوة له، والعصير لي.
والذي كنت أشربه على مرة واحدة بعد كوب أو أكثر من المياه المثلجة حتي أعوض ما عانيته في الأتوبيس المتهالك الذي كان يرزقني الله به دائما ليستولي على المياه التي كانت بداخلي من خلال العرق.
لذلك كنت لا أحتاج إلى دورة مياه نهائيا، وحتي لا أدفع كثيرا في الباص، أو الميكروباص، خصوصا أنني كنت أسير في الشارع من أوله حتي آخره حيث كان يقيم في نهاية الشارع.
أثناء حديثنا يقول لي كمال الطويل: (كأني قاعد مع نوح، بقيتوا واحد، حتى في طريقة الكلام)، قلت له: (نوح متكلم وحكاء، وأنا لا أتمتع بهذه الخاصية إلا معك).
يعود كمال الطويل ويسألني: (هو أخباره إيه؟!)، أقول له: (حالته النفسيه زي الزفت، الشيوخ اللي بيوافقوا علي طبع شرايط قرآن الكاسيت ورطوه توريطه جامده.
وخسروه اللي قدامه، واللي وراه، وانتقموا منه بطريقتهم الدينية، حضرتك عارف إن شركة (النهار) يادوب لسه بتقول يا هادي، والشريط الوحيد اللي أنتجته هو شريط (لا تنسانا)، اللي أنا كتبت فيه 10 أغنيات، ازاي خلوه يطبع سور من القرآن ما بتوزعشي؟!)
إقرأ أيضا : إبراهيم رضوان يكشف لـ (كمال الطويل) حقيقة زنزانة مصطفى أمين
يعتدل الأستاذ كمال الطويل في جلسته وهو يقول: (أستغفر الله العظيم، هو فيه سور في القرآن، ممكن ماتبيعش، وسور بتبيع هو مش كله كلام ربنا).
أقول له: (أيوه كله من عند ربنا، بس هاتقول ايه لعقول الناس القذرة)، يقول لي باستغراب شديد: (زي إيه من السور القرآنية اللي ممكن تخسره، وما تتباعشي لو طبعها؟!)
أقول له: (أي سور فيها جهنم، والموت، والعقاب، ونهاية المفتري، أي حاجه فيها صلصلة جهنميه).
يضحك كمال الطويل ويظن أنني أمزح معه، فجأه يسألني: (طيب والسور القرآنية اللي بتوزع)، أقول له: (نوح بيقول، سورة مريم، وسورة يوسف، و أي سوره مفيش فيها سيرة جهنم، وفيها الجنة، والنعيم، والغفران).
يسألني الأستاذ كمال الطويل: (والشيوخ عملوا معاه ليه كده؟!) أقول له: علشان كبر دماغه، وما قبضهومش!).
كمال الطويل يسألني عن نوح
الأستاذ كمال الطويل عن عشرات الأغنيات التي كتبتها لنوح، وحتى الآن لم يحاول مطرب أو مطربة أن يعيد تقديمها، فأبلغه أنني السبب، فمحمد نوح حاول معي أن نعطي الأغنيات لمن يريد أن يغنيها مجانا.
فأبلغته أننا بذلك نحكم عليها بالإعدام، وقلت له: أنت الوحيد يا نوح الذي يستطيع أن يقدمها بالشكل الذي أريده والذي تريده.
يوافقني الأستاذ كمال الطويل على ذلك، ويقول لي: (أنا زيك، لما الأغنيه بألحنها لمطرب أو لمطربة، يبقي ممنوع حد يغنيها غيرهم).
إزاي يا أستاذ كمال لحضرتك أغنيات كثيرة جدا، غناها أكتر من صوت، يعني اتباعت أكتر من مرة، زي اللي عمل كده بليغ حمدي، لما لحن أغنية (يا مسا الجمال علي حبايبنا) وأعطاها لأربع أصوات هم (سميرة سعيد، وإلهام بديع، ولطيفة، وليلي مراد)،
وأعطي (علي حسب وداد جلبي) لإلهام بديع، وعبدالحليم حافظ.
فرد كمال الطويل مندهشا: لم يحدث ما تقوله!، فقلت له: وأنا في غاية الخجل: (حضرتك لحنت أكتر من أغنية، و بيعتها لأكتر من مطرب ومطربة، مثل (أسمر يا اسمراني) اللي أعتبرها من أحلي ألحان حضرتك، غنتها فايزة أحمد، وعبد الحليم حافظ.
إقرأ أيضا : إبراهيم رضوان يكتب: مع (كمال الطويل).. ذكريات المعتقل!
وكمان أغنية (ليه خليتني أحبك)، غنتها نجاة الصغيرة، وليلي مراد، و(خالي البيه)، غنتها فاطمة عيد، وسعاد حسني، وأغنية (مصر هى أمي) غناها فؤاد المهندس، في فيلم (فيفا زلاطه) وبعدين غنتها عفاف راضي رغم أن المهندس غناها أحلي بكتير.
ويقاطعني الأستاذ كمال الطويل: علي فكرة أول مرة انجرح من كلمة منك!، أشعر بالحرج، وأقول له: (أنا قلت إيه يا أستاذ كمال يزعلك).
يقول لي: (كلمة اني بعت، أنا عمري ما بعت أغنية، مش هاتصدق لو قلتلك أني عمري ما خدت من مطرب أو مطربة مليم واحد، بعكس كل الملحنين، رغم إني متجوز، وعندي مسئوليات خاصة، والتزامات كتيرة، ليه؟!، هاقولك لأني أعتبر نفسي أتعامل مع مؤسسات لا أفراد!
وقبل ما أنسي انت ليه رافض تكتب لعفاف راضي أو تتعامل معاها، رغم انكم أصدقاء جدا؟!، أقول له: (مين اللي قال لحضرتك إن إحنا أصدقاء جدا، قصدي مين اللي قال إني ما كتبتلهاش؟!).
يسألني كمال الطويل: (يعني كتبتلها أغاني قبل كده؟!)، أخبره أنني كتبت لها كلمة واحدة، يتعجب الأستاذ، ويقول لي: (مش فاهم، هو فيه شاعر يكتب لمطرب، أو مطربه كلمة واحدة، تيجي ازاي؟!).
أقول له: (لما عفاف قالتلك مش مستطعمة جملة، (عشه جنب نيلك، تسوى ألف قصر)، كلمة عشة مضايقاني، فطلبت مني أغيرها فكتبت لها كلمة (ضلة) جنب نيلك، بعد كده حضرتك قلت لعفاف أنا هاطبع كروت، وأكتب عليها إبراهيم رضوان المصلحاتي.
لماذا لا تكتب لعفاف راضي
أتحدث مع الأستاذ كمال الطويل أيضا عن الاتهامات التي توجه لمحمد عبد الوهاب عن عشرات الأغاني التي يتهمها به الدكتور يوسف شوقي في كل مكان بأن معظم ألحانه مسروقة.
والباقي لحنه له الملحن رءوف ذهني، وكان رد عبد الوهاب، دا توارد خواطر، يضحك الأستاذ كمال الطويل، وهو يحاول أن يهرب من موضوع عبد الوهاب لأنه يكره جدا أن يتحدث عن أحد في غيابه.
ويقول لي كمال الطويل: (زي ما قلتلك قبل كده، عمري ما جربت توارد الخواطر ده، يمكن كانت بتحصل أوقات، وأنا ما اعرفشي ليه، لأني فضلت أكتر من سنتين، أقدم برنامج بصوتي اسمه (صوت الموسيقي).
احتمال يكون فيه جملة، أو شبه جملة نطت على لحن من ألحاني لأني في الفتره دي، فعلا كنت متشبع بالأغاني الأجنبية، بس ربنا هو اللي عالم، إني عمري ما اتعمدت آخد حاجه من حاجة حد لأن دي تبقي سرقه و قلة أدب.
رغم أن القانون بيسمحلك تسرق 4 موازير، إذا بقوا خمسة تبقي حرامي، بس برضه زي ما قلتلك عمري ما فكرت في كده.
إقرأ أيضا : إبراهيم رضوان : حكايات كمال الطويل مع أم كلثوم وعبدالوهاب
ويسألني كمال الطويل: (يا تري أنت مفيش جمله في أغنية عجبتك وخدتها)، أقول له لو عجبتني جملة وخدتها يبقي معني كده اني هاسطوا على كل إنتاج مرسي جميل عزيز، لأني باحب كل أعماله بشكل جنوني.
واتربيت عليها، ويسألني كمال الطويل: (بتحبه، إلي درجة التقديس، وهوعارف كده؟!)، فأرد عليه: (لأ أول مرة أقابله كانت في الإذاعة، كان ماشي ومعاه محمد الموجي، وعفاف راضي).
ويومها (عفاف) عرفتنا ببعض، الراجل لم يعطني فرصة أن أعبر له عن شعوري، اللي يضحك يا أستاذ كمال أنه هو اللي فضل يتكلم عني، في الوقت اللي كنت خدت علي نفسي عهد أن أول ما اشوفه، لازم أبوس الإيد اللي كتبت الكلام ده.
يومها مرسي خد الموجي وعفاف ومشي، وأنا مذهول من شخصية هذا الشاعر اللي متربي جدا جدا، سألني الأستاذ كمال الطويل: (متربي جدا جدا ازاي؟!).
مرسي جميل عزيز متربي جدا
لم أجد تعبيرا أمامي أقوله غير دا متربي يا أستاذ كمال جدا جدا إلى درجة، وعندما لم أجد إكمالا للجملة، قلت له: متربي جدا جدا إلي درجة قلة الأدب.
بعدها قابلت (عفاف) تاني يوم، وشكرتها أنها عرفتني بأستاذي، ويومها سألتها يا تري ياعفاف اتفقتوا علي شغل؟ قالتلي: (طبعا خدت منه أغنية من أجمل الأغاني اللي كتبها في حياته بيقول لقاها بالصدفه في درج مكتبه، والموجي هايبتدي يلحنها النهارده).
الله ممكن اسمعها، أو أسمع مطلعها طبعا بس ماتجيبشي لحد سيرتها، تسمعني عفاف الأغنيه وهى مبهورة بكلماتها
فايت علي بيتنا، حتي ما حيتنا
بكلمتين اتنين، ولا بنظرة عين
قصدك تموتنا
بعد انتهاء عفاف من كلمات الأغنية سألتها: (هو قالك أنها معموله علشانك؟!) قالتلي: (لأ دا لقاها تايهه في الدرج) قلت لها: (يا عفاف الأغنية دي من أشهر أغنيات صباح، وبتغنيها من ييجي 50 سنة.
فتقول لي عفاف: (بتتكلم جد!)، أيوه وغنتها في فيلم بيتذاع علي طول في التليفزيون، ومين اللي هايلحنها ليكي، محمد الموجي برضه.
ينفجر الأستاذ كمال الطويل في الضحك ويقول لي: (الموجي بطبيعته تايه، ولما تكون ماشيه معاه ست ما بيفتكرشي حتى أغنياته، واضح انك بتحب صباح قوي، وحافظ أغانيها).
أقول له: حافظ كل أعمال مرسي، يقول لي: طيب وصباح فأقول له: عندي أسمع عفاف راضي، وما اسمعهاش، يقول لي: مش فاهم، أقول له وأنا أنصرف، والله ولا أنا!
أطالب محمد منير بالاعتزال
واختتم بهذه الأغنية التي كانت الشعره التي قصمت ظهر البعير، والتي كتبتها لمحمد منير أطالبه فيه علي لسان الكورال بالاعتزال:
الساعه كام
الساعه كام دلوقتي، ساعة العمر كام
الساعه واحدة، ولسه باقي الليل طويل
نرجع بقي للبيت ياريت أقدر أنام
حاول إذا قدرت عنيك، ودا مستحيل
لكني قادر ع الطلوع فوق السطوح
علشان أصحي الناس من النوم اللي طال
إنتي حبيبة الروح، مفيش غيرك طموح
ومفيش سواكي يا طاهره عايش في الخيال
………………………………..
الدنيا ليه أشواك في كل مكان هنا
الدنيا فيها بنفسجه طارحه لنا
داست علينا و دبلت فينا الغنا
بالعكس.. لسه السكه خضره حنينة
لكني قادر ع الطلوع فوق السطوح
علشان أصحي الناس من النوم اللي طال
إنتي حبيبة الروح مفيش غيرك طموح
و مفيش سواكي يا طاهره عايش في الخيال
………………………………..
سواح ومش قادر تعود للبيت هناك
أقدر أعود في أي لحظه بالحصان
فاكر زمان أيام ما كنت هناك ملاك
وما زلت ملو هدومي، مالك في المكان
لكني قادر ع الطلوع فوق السطوح
علشان أصحي الناس من النوم اللي طال
إنتي حبيبة الروح.. مفيش غيرك طموح..
ومفيش سواكي يا طاهره عايش في الخيال
………………………………..
سلم بقي الرايه لغيرك وانسحب..
ازاي و انا ما زلت ع المدنه بلال
ولا نقطة نازله وغازله غنوة م السحب..
بكره المطر يملانا بالغنوة الحلال
لكني قادر ع الطلوع فوق السطوح..
علشان أصحي الناس من النوم اللي طال
انتي حبيبة الروح.. مفيش غيرك طموح..
ومفيش سواكي يا طاهرة عايش في الخيال
………………………………..
حاول بقى ترتاح و تنهي رحلتك..
ازاي و أنا الأمل اللي باقي للي تاه
احنا شبعنا عسل زمان من نحلتك..
والله لسه كأني في حالة صلاة
لكني قادر ع الطلوع فوق السطوح..
علشان أصحي الناس من النوم اللي طال
انتي حبيبة الروح.. مفيش غيرك طموح..
ومفيش سواكي يا طاهرة عايش في الخيال.