بقلم الشاعر الكبير: إبراهيم رضوان
لم أفكر في يوم من الأيام، إذا كان الوقت مناسبا لزيارة الموسيقار الكبير كمال الطويل من عدمه، كنت أتعامل معه كإنسان على استعداد أن يتحمل زياراتي في أي وقت، وكل وقت، وكان يقول لي دائما أن مناقشاتي معه تسعده، ويقسم أنه لم يضحك من قلبه من أيام النكسة إلا معي، كان هو صندوقي الأسود الذي يحتوي على كل أسراري التي لا أستطيع أن أحكيها لأي أحد، قال لي يوما أنه يستمع لأعمالي مع محمد نوح و غيره في غيابي، وأنه يحب أغنياتي لأنها متميزه، وكان يقول لي دائما أن الفنان بدون تميز كالنكته القديمة التي سمعتها قبل ذلك من شخص آخر.
وكان الأستاذ كمال الطويل يضرب المثل بالفنان جورج البهجوري قائلا: (شوف لجورج أي لوحة في أي مكان هاتلقي بصمته وريحته فيها، الليثي نفس الوضع ناجي، حتي بالنسبة للكاتب الصحفي تعالي نضرب المثل بمحمود السعدني لما اتخانق مع أحمد فؤاد حسن كتب عنه مقاله ختمها بإيه يقول برنارد شو: (عندما تنتهي الموسيقي، يصفق الناس لا لأنها أعجبتهم ولكن لأنها انتهت)، ويبدو أن برنارد شو يقصد موسيقي أحمد فؤاد حسن فقط.
أقرأ أيضا : إبراهيم رضوان يكتب: أنا و كمال الطويل وعسكري المرور!
وعندما اختلف مع الفنانة ماجدة أبلغ القراء أن العسكري سيقبض عليه ويسجنه، ثم تفهم من المقالة أن المقصود هو (صبري العسكري) المحامي، الذي كلفته ماجدة برفع قضيه علي السعدني، وعندما هدمت إسرائيل مدرسة بحر البقر، وقتلت كل تلاميذ المدرسة كتب في مجلة (صباح الخير) مقالة عن (موشيه ديان) كان ختامها: (بقتلك لأطفال بحر البقر أثبت أنك وسخ وأعور، وإبن ديك كلب)، وكان يسمي المخرج حسن الإمام، حسن الإمام أبو شرطه هذا هو التميز)، ثم يسألني: (هل كتبت جديد لأي أحد في هذه الفترة؟!، أقول له: (الكنج طلب مني بعض الأغنيات)، فيسألني: مين الكنج ده؟! فأرد: منير!
عبد الوهاب يرفض تسمية منير بالكينج
فيقول لي كما الطويل: (هو مسمي نفسه الملك، مفيش ملوك غير ملك الكوتشينه، وملكة بريطانيا)، فأقول له: (مش هو اللي مسمي نفسه، الناس هما اللي سموه)، فيرد: المفروض يرفض التسمية، الفنان الحقيقي درجته أعلي من درجة الملك، حليم يوم ما مطربة مشهورة، أحبت ترمي كرسي في الكلوب في حفله من حفلاته، وبعتت ناس بجاكته يلبسوهاله علي المسرح، وهو رفض، الناس قعدت تهتف، بص شوف عبد الحليم بيعمل إيه، فرد عليهم وقال لهم: ماعملتش حاجه!، بس فعلا قدرت تخرجه عن أعصابه لأول مرة، وتوصله أن يحط صوابعه في بقه، ويقول لهم : ما أنا برضه ممكن أصفر زيكم).
يأخذنا الكلام مع الأستاذ كمال الطويل وأسأله حضرتك بتكره عبد الوهاب ليه؟! فيرد: (لأ إسألني عبد الوهاب بيكرهك ليه؟)، فأسأله: عبد الوهاب بيكرهك ليه؟ فيقول: (لما كنت بادور علي (رءوف ذهني) في معهد الموسيقي ودخلت وأنا مش واخد بالي الأوضه اللي عبد الوهاب بيعمل فيها بروفة أغنية ليلي مراد (اتمخطري واتمايلي يا خيل)، بمجرد دخولي قال للفرقة: استوب وتضايق جدا من وجودي!، ساعتها وبسرعه راح له (رءوف) وقاله: (دا كمال الطويل، خريج معهد الموسيقى المسرحية كمطرب، يعني مالهوش دعوه بالتلحين نهائى، فعلا يوميها انجرحت، خصوصا إن كان عندي إحساس أن الدنيا ظلمتني).
فاتت الأيام واتغير مجري حياتي يقول كمال الطويل: (وبقيت ملحن في الوقت ده كنا بنعيش فترة العدوان الثلاثي أعلنوا عن مسابقة يتم فيها اختيار سلام جمهوري لمصر، لما لقيت اللي متقدمين وصل عددهم إلى 78 ملحن، منهم محمد عبد الوهاب كسلت أقدم ونسيت الموضوع ده تماما، ويوم إعلان النتيجة اتصلوا بيا وبلغوني بفوز أغنيتي (والله زمان يا سلاحي) بالجائزة الوحيدة، ومش بس كده هاتبقي كمان النشيد الوطني لمصر، بلغتهم اني ما قدمتش في المسابقة، قالولي ومع ذلك فازت غنوتك بإجماع الآراء)!
أقرأ أيضا : إبراهيم رضوان يكتب : كمال الطويل وعبدالحليم حافظ في خلية سرية
من يومها وعبد الوهاب مش طايقني، ولا طايق الأغنية، لذلك كانت أمنيته إن الأغنية دي تتلغي وبمجرد ما الرئيس محمد أنور السادات أخد جائزة نوبل مناصفة مع بيجن، اتصل بالسادات وقال له : احنا في حالة سلم يا ريس إزاي السلام الجمهوري يبقي بدايته (والله زمان يا سلاحي)، و نهايته (يا حرب و الله زمان) وأقتنع السادات، و مع ذلك اختار أغنية لسيد درويش اللي ادعي عبد الوهاب أنه موزعها مع إن اللي موزعها الفنان مختار السيد، عبد الوهاب في تسجيل الأغنيه لبس بدله من غير رتب، بقي صول يعني، مع إن السادات كان أعطي له رتبة لواء ودكتور!
ويستطرد الأستاذ كمال الطويل: نخرج من سيرة عبد الوهاب، لأحكي له حكاية غريبة جدا، حدثت أمس عندما كنت في ضيافة مطربه شابه مشهوره جدا عندما رن جرس التليفون في شقتها فقالت: ألوه..مين؟! فرد المتصل: أنا فلان شقيق المطرب فلان، والمطرب فلان هذا كان من أكبر المطربين والملحنين العرب، لا علي مستوي مصر فقط بل علي مستوي الأمة العربية، ظننت المطربه أنه يتصل بها ليبلغها أن شقيقه سيلحن لها أغنية لذلك فرحت جدا ورحبت به بشكل خاص، وسألته عن صحة أخيه، فأخبرها أنه ما زال مريضا، وحالته مش ولا بد!.
أقرأ أيضا : إبراهيم رضوان يكتب: قصته مع كمال الطويل وأغنية (في المحطة)
وفجأه قال لها: علي فكرة أنا جيبلك عرض ما حدش يحلم بيه!، فردت وسألته: أشكرك جدا عرض إيه؟! قال لها: (حضرتك هاتروحي شقة السلطان فلان كل يوم خميس تقعدي معاه ساعة، وهاتاخدي في كل مرة ظرف فيه 40 ألف جنية، ليا 40% منهم، زي ما باعمل مع كل الفنانات)!
فسألته: (يعني هاغنيله؟) فقال لها: لأ!، فسألته: أمال هاروحله ليه؟! فقال لها: علشان تفرفشيه الراجل ده عنده فوق التسعين سنة، يعني مش هايتعبك).
فسألته: أفرفشه ازاي؟ فقال لها: يعني شوية هزار مع دلع، وسألها: هو حضرتك بنت؟! فقالت له: حضرتك عارف اني لسه ما اتجوزتش، فقال لها: يعني لسه بنت، كده الرقم يزيد لأنه هايبقي أول واحد يقتحم حصونك!.
فقامت المطربة الشابة بسبه قائلة: (إنت راجل قليل الأدب، وإبن كلب)، ورد عليها: (وانتي بنت كلب غبية، مش هايفوت أكتر من أسبوع، وهاتجيلي زاحفه علي بطنك، تبوسي الجزمة، وتقوليلي موافقه، أسبوع بالكتير وهاتتصلي بيا)! فردت عليه: (هاتصل بيك بعد أسبوع، علشان أقلك البقيه في حياتك، في أخوك يا وسخ يا قواد!).
الغريب أن بعد أسبوع يقول كمال الطويل: مات شقيقه المطرب والملحن الشهير، وشاهدت جنازته في التليفزيون، حيث كان السلطان العجوز يتساند علي كل من بجانبه، لأنه لا يقوي على المشي!.
كمال الطويل والقواد!
أخبرني الأستاذ كمال الطويل أن هذا الرجل معروف في الوسط الفني، بأنه قواد كبير، ومن أقذر النماذج التي من الممكن أن تراها!
والآن أترككم مع هذه الأبيات:
كسر جدران الزيف كسر
خلي أحلامك تتفسر
تتحسر.. لا.. ولا تتأثر
أحجار الوهم هاتتكسر
لو هانزف أعزف ألحانك
واتحول ديك فوق جدرانك
بهواكي ..ولازم ألقاكي
واتحدى العالم علشانك
…………………………
وحياتك.. وانت المذكورة
في جميع الكتب المنشورة
أنا لازم أخرج والاقيكي
آخذ من عمري وأديكي
و اقراكي غنوة وحدوتة
واهديكي شباكي وأسماكي
هانت يا ليالي الخوف هانت
والنجمه التايهة خلاص بانت
كانت أحلام وهاتتحقق
ها أطفي الأيام لو يوم خانت
لو هانزف.. أعزف ألحانك
واتحول ديك فوق جدرانك
بهواكي ولازم ألقاكي
واتحدى العالم علشانك
…………………………
يا شرانق ..خارج يا شرانق
الصمت ان طال.. يبقى مشانق
أنا عافي.. و متعافي.. ودافي
والصبر طريق من تأليفي
ووليفي عنيكي المرسومه
بلبل ويمامة على كتافي
أنا خارج.. سارج فوانيسي
هاوصلك على ضوء أحاسيسي
مش ناسي وراسي علي شطوطك
وهاتعلى بيوتك بأساسي
لو هانزف.. أعزف ألحانك
واتحول ديك فوق جدرانك
بهواكي.. ولازم ألقاكي
واتحدى العالم علشانك.