إبراهيم رضوان: عدم رضائي عن تغيير كلماتي أضاع لقائي بـ كمال الطويل

بقلم الشاعر الكبير: إبراهيم رضوان

وما زالت ذكرياتي مع الموسيقار المبدع كمال الطويل تتدفق أمامي، وكأنها حدثت بالأمس القريب، حيث طالت جلساتي مع هذا المبدع المحترم الذي كنت أزوره شبه يوميا، كنت أحكي له، ويحكي لي، ففي إحدى هذه الجلسات فتح لي قلبه وقال لي: (إوعي تفكر يا إبراهيم إن المشوار كان سهلا، أنا لما قدمت لمعهد الموسيقي، كان ميعاد التقديم انتهي، اتضح أن اللي بيستلم الأوراق كان صديق لوالدي، علي هذا الأساس بقيت طالب في المعهد مع مين أحمد فؤاد حسن، علي إسماعيل، وعبد الحليم حافظ اللي هايتخرج عازف، وأنا اللي هاتخرج مطرب برضه).

واتخرجنا كلنا، يقول كمال الطويل، وكل واحد من الدفعة راح في طريق، لكننا كنا على اتصال ببعض، وفي هذه الفترة كنت أتساءل هنروح فين، ونعمل ايه؟! أنا بأحب التلحين، دورت على عبد الحليم شبانه، لقيته بيشتغل مدرس موسيقى في الزقازيق، وجلس هناك، سافرت له قلتله ما ينفعشي نقعد في بيوتنا وأقنعته بالرجوع إلى القاهرة، وفي هذه الفترة كنت بشتغل في الإذاعة، وعايز الحن، قلت أروح لصديقي الملحن رءوف ذهني، معهد الموسيقي يمكن يساعدني في العثور علي شغل، روحت المعهد سألت عليه، شاورولي علي أوضه، أنا بسلامة نيه فتحت الباب!.

إقرأ أيضا: إبراهيم رضوان يكتب: أنا و كمال الطويل وعسكري المرور!

ويضيف كما الطويل: ودخلت لقيت محمد عبد الوهاب قاعد وحواليه الفرقة كلها وبيعمل بروفات علي أغنية (اتمخطري و اتمايلي يا خيل) التى غنتها الفنانة الرقيقة ليلى مراد، أول ما عبد الوهاب لمحني، وشه اصفر، واتعصب، ووقف البروفه و قال لهم : (اللحن اتشم)!، وجري رءوف ذهني عليه ووشوشه، وفهمه أن ده صديق له، وأنه خريج معهد الموسيقي كمطرب، وأنه دخل عن طريق الخطأ لأنه كان بيدور عليا، ابتدي عبد الوهاب يكمل البروفة وعينه على، وأنا بطبيعتي خجول، علشان كده خرجت أستني رءوف في جنينة المعهد لحد ما البروفه انتهت، عبد الوهاب وهو خارج بص على بصه مليانه كراهية وغل، وديت وشي الناحية التانية.

كمال الطويل يكره عبد الوهاب

من هنا كانت بداية كراهيتي لعبد الوهاب، يقول كمال الطويل، وفى هذه الفترة عرضت علي عبد الحليم نروح اسكندرية، مشينا علي الكورنيش ومفيش في جيبنا ولا مليم، فجأه لقينا نفسنا قدام ملهي ليلي بيغني فيه شكوكو، طلبنا نقابله، فين وفين على ما وافق يقابلنا، قدمت له نفسي كملحن، و قدمت له حليم كمطرب، وأثناء جلوسنا معه أبلغته انني عندي له منولوج هايكسر الدنيا، طلب مني أسمعهوله، المنولوج اللي سمعته كنا نردده مع بعض وكان بعنوان (يا إسكندرية.. صبرك عليا).

قبل ماكمل اللحن، وقف شكوكو، ونده للعمال اللي موجودين علشان يطردونا بره، لكننا خدنا بعضنا وخرجنا من عنده قبل وصول العمال، مشينا على الكورنيش، قابلنا مدام تحية كاريوكا قبل دخولها المسرح اللي بيغني فيه شكوكو، حكيت لها عن اللي عمله شكوكو معانا، طلعت مبلغ من شنطتها وحطيته ليا في جيبي، كانت إنسانه فعلا، وبميت راجل!.

إقرأ أيضا : إبراهيم رضوان يكتب : كمال الطويل وعبدالحليم حافظ في خلية سرية

رجعنا القاهرة، عايز ألحن افتكرت أغنيه بالفصحي من أشعار والدي بدايتها بتقول:

إلهي ليس لي إياك عونا..

فكن عوني علي هذا الزمان

ويستطرد كما الطويل: لحنتها واقترح عبد الحليم نسمعها لزميلتنا فايده كامل لأنها معتمده في الإذاعة، وبالفعل غنت فايدة الأغنية، ونجحت جدا، وانتشرت، ابتديت أدور في أوراق أبويا عن قصائد تانيه تنفع تتغني لقيت قصيده بتقول :

قل أدعو الله إن يمسيك ضر..

ووجه ناظريك إلي السماء

وأيضا نجحت الأغنية بصوت شادية، بعدها لحنت لعبد الحليم أغنية (علي قد الشوق اللي في عيوني يا جميل سلم) من كلمات كونوستابل إسمه محمد علي أحمد، ونجحت الأغنيه في الوقت ده جدا.

كمال الطويل وعبد الحليم

وكان عبد الحليم قام بتغيير اسمه من عبد الحليم شبانه إلى عبد الحليم حافظ، اعترافا منه بفضل حافظ عبد الوهاب المذيع الشهير في هذا الوقت، واللي قدمه في برنامج (ركن الهواة)، بعدها قدمت لعبد الحليم معظم أعماله الناجحة مثل (إحنا الشعب، بالأحضان، مطالب شعب، يا أهلا بالمعارك، المسئولية، صورة، حكاية شعب، أحلف بسماها، بالدم، إنذار، إضرب، يا بركان الغضب، إبنك يقولك يا بطل، صباح الخير يا سينا) لحد العدد ما وصل إلى 56 أغنية.

إقرأ أيضا : إبراهيم رضوان يكتب: قصته مع كمال الطويل وأغنية (في المحطة)

بقيت نجم، هذ وكل حفله يطلعوني علي المسرح أحي الجمهور بالقوة، قلت أرشح نفسي لمجلس الشعب، ربنا ما وفقنيش، لكن عوضني بتعيين في مجلس الشوري.

قاطعت ذكريات الأستاذ كمال الطويل قائلا: (مش ملاحظ أن بداية حليم، مشابهه لبداية محمد منير؟!)

سألني: إزاي؟!

كمال الطويل ومحمد منير

قلت له: عبد الحليم أول ما نزل مصر قعد في شقة أخوه اسماعيل شبانه، وإسماعيل هو اللي كان بيصرف علي أخوه حليم، اللي كسر الدنيا، وإسماعيل أخوه اختفي!، زي ما منير وصل مصر، وقعد في شقة أخوه الحاج فاروق اللي كان ترك النوبه وجاء للقاهرة علشان يغني، وأشتهر منير، وأخوه فاروق اتنسى.

قاطعني كمال الطويل وسألني: أخبار منير ايه؟!

قلت له: منير نفسه يغنيلك يا أستاذ كمال.

فقال لي: (خلاص اتجدعن، واكتبلي أغنيه لمنير تكون خطوة مؤثرة في رحلته الفنية)، بعد عدة أيام أبلغته أن أغنية منير جاهز، طلب مني أن أسمعها له، وكانت الكلمات تقول :

جناين النادي..

طرحت والطرح عادي

قالوا والشمسيه همسه

واللمسه صوتها هادي

قالوا والفاكهه جارحه

فبلاش يا غريب تنادي

رديت، دي طارحه طرحه

لحبيبة الروح يا سيدي

……………………..

فدادين.. يا عيون حبيبتي..

وحزين يا رمشها

أنا راجع بعد غيبتي..

ليمامتي وعشها

أهلا تاريخ ميلادي

قالوا، والفاكهه جارحه

فبلاش يا غريب تنادي

رديت دي طارحه طرحه..

لحبيبة الروح يا سيدي

……………………..

أبنيلك بيت..عنيا..

البيت في ضلوعي مبني

أسقيكي نور عنيا..

لو حتي الليل شربيني

واوصلك في ميعادي

قالوا، والفاكهه جارحه..

فبلاش يا غريب تنادي

رديت..دي طارحه طرحه..

لحبيبة الروح يا سيدي

……………………..

يا حبيبتي..كل حاجه..

بتشد فيا ليكي

موجه تسرق..وموجه..

تحرس م الليل عنيكي

و تجيب إيدك لإيدي

قالوا و الفاكهه جارحه..

فبلاش يا غريب تنادي

رديت.. دي طارحه طرحه..

لحبيبة الروح يا سيدي

بعد فترة أسمعني الأستاذ كمال الطويل الأغنيه بلحن من أجمل الألحان التي لحنها في حياته، ولكن لأن الحلو مابيكملشي، لاحظت أنه في نهاية كل كوبليه يقول:

رديت دي طارحه طرحه..

لحبيبة الروح بلادي

بدلا من

لحبيبة الروح يا سيدي

أخبرته أنه قام بتحويل الأغنية من عاطفية إلي أغنية وطنية، أخبرني أن التغيير الذي قام به هو الذي سيتسبب في نجاح الأغنيه بصوت منير، كنت في غاية الخجل وأنا أبلغه بعدم موافقتي علي التغيير، وماتت الأغنية إلي أن اشتراها مني المطرب الفلسطيني الأردني ناصر البندي، ليلحنها له شقيقه الملحن خالد البندي.

ومن ألبوم الذكريات

شديت رحال الروح

شدِّيت رحال الروح يمِّك ..

يا ام الضفاير صفصافى

جوه الوريد شايل دمك ..

يا ام القمر فى السما صافى

يا اللى انتى فى الأصل حدودي

حالف بحبك لا تعودى

أصل انتى فى الأصل حبيبتى..

يا حبيبتى من قبل وجودى

……………………..

فوق الحصان شايفك سارحه ..

يا ام الملامح سلطانه

أرسم على قُورتك طرحه ..

 يا عيون كحيله ونعسانه

وأغير عليكى من النسمه..

وارسم عليكى ميت رسمه

يا اللى انتى فى الأصل حدودى

حالف بحبك لا تعودى

أصل انتى فى الأصل حبيبتى ..

يا حبيبتى من قبل وجودى

……………………..

جايلك بروحى القلقانة..

من خطوة السكه الجايّه

إنسان بينده إنسانه ..

علشان يعيشوا فى حريه

وبيقسم اللقمه ما بينكم ..

لاجل الشيطان يبعد عنكم

يا اللى انتى فى الأصل حدودى

حالف بحبك لا تعودى

أصل انتى فى الأصل حبيبتى ..

يا حبيبتى من قبل وجودى

……………………..

فى الخنقه بيجينى نسيمك

 ويزورنى طيفك على سهوه

فى مرايتى ألمح تقاسيمك

تشاركنى فنجان القهوه

يا شايله صورتى فى ألبومك ..

بالحب يسعد أيامك

يا اللى انتى فى الأصل حدودى 

حالف بحبك لا تعودى

أصل انتى فى الأصل حبيبتى ..

يا حبيبتى من قبل وجودى

……………………..

ولا حد غيرك وَنِسنى ..

ساعة هروب الصوت منى

نزل القمر لاجل يبوسنى ..

شافنى معاكى .. بِِعد عنى

واستنى لما انتى مشيتى..

بعدين نزل يحضن بيتى

يا اللى انتى فى الأصل حدودى 

حالف بحبك لا تعودى

أصل انتى فى الأصل حبيبتى ..

 يا حبيبتى من قبل وجودى.