بقلم الشاعر الكبير: إبراهيم رضوان
المشكله عند صديقي و حبيبي (محمد منير) أنه صدق من أقنعوه أنه الملك!، لذلك بدأ يضع ساقا على ساق أثناء الجلوس مع نفسه، عندما كنت سأكتب له أغنية (الأم) التي حدثت بسببها مشكله مع المنتج الذي يطبع له ألبوماته، قال لي: (مين اللي هايغني في الشريط؟)، قلت له: (علي الحجار، والحلو، ومدحت صالح و..)، وقبل أن أكمل كما قلت قبل ذلك قال لي: (ماتزودهاش عن 3 دقائق، كلهم علي بعضهم ما ياخدوش في إيدي أكتر من كده!).
في أحد الأيام طلب مني أحد الأصدقاء أن يتعرف على (منير) أخذته لمنزله، يومها كان نائما، واستعمل صديقي تليفون منزل (منير) في مكالمة، واستيقظ (منير) من النوم وحاول استعمال التليفون فوجد أن السماعه موضوعه بالخطأ، تغير لونه، وتغيرت ملامحه وهو يصرخ: مين اللي استعمل التليفون ده في غيابي؟!
قال له صديقي وهو في شدة الخجل: أنا يا أستاذ منير!
قال له منير: هو انت مش عارف أن السماعه لما بتتحط غلط، بتقطع الحراره فترة، قال له صديقي: أنا آسف جدا.
لم يرحمه منير فرد عليه قائلا: بتعتذرلي بعد ما ارتكبت في حقي جريمه!
شعر صديقي بالحرج وطلب أن يمشي، ولم يمانع (منير) ومد له يده ليسلم عليه ولكن صديقي انصرف دون أن يسلم عليه، بعد مغادرة صديقي قلت له: اتصرفت في حق صديقي تصرف مش حلو يا منير!
فسألني سؤالا استغربت له: هو صديقك؟!
قلت له: آمال صديق مين يا منير؟!
قال لي: والله أنا اعتقدت أنك جيت لقيته هنا، وفكرته حد من اللي جايين يتصوروا معايا!
قلت له: حتي لو واحد من الشارع جاي يتصور معاك ما تعملش معاه كده!، وتركته لألحق بصديقي الذي لعن اليوم الذي طلب مني أن أعرفه لمنير!
لاحظت أن (منير) يكره كل من ساهموا في رحلته مع النجاح، كنت في زيارة الفنان مدحت الخولي الذي كتب له ولحن (انتي بلاد طيبه)، وأغنيتي (قلب الوطن مجروح) من كلماتي، و(يا بنت يا ام المريله الكحلي) لصلاح جاهين، وأغنيات أخري، لاحظت أنه لا يرد علي تليفوناته وانقطع عن التعامل معه نهائيا!، كذلك فعل مع الموسيقار (عبد العظيم عويضة) الذي لحن له أغنيتي (الناس نامت إلاك، وزمانه ماشي بخطوه يضم، وثناء محيدلي) وأعمال أخري ناجحة.
كذلك دخل في مشكله مع ورثة أستاذه (أحمد منيب) الذي لحن له أحلي أغنياته، ودخل في مشكلات مع أعز أصدقائه (يحي خليل)، وكل الذين لحنوا له أو كتبوا أغنياته!، فهو يتميز بطيبه شديدة ونكران جميل أشد!
قررت بعد فتره أن أبتعد عن (منير) لولا أنني وجدته يتصل بي من الخارج ليخبرني أن موعد عمليته في الركبه غدا، وأنني الوحيد الذي يكلمه، وطلب مني أن نتعاون مرة أخري وأخذ يحدد لي عشرات المواعيد ولا يرد!
وفي حفل مذاع علي الهواء فوجئت به يقول: (طول ما إبراهيم رضوان موجود، أنا مطمئن على مستقبل الأغنية في مصر)، بعدها اتصلت به شكرته علي ما قاله عني، واتفقنا على أعمال غنائية جديدة منها أغنية بعنوان (شباك عليه قُلة) التى تقول كلماتها:
يا ام العيون طلة.. وام النجوم هله
لو حتى طال الليل.. بكره أكيد أحلى
ياما نفسى أملاكى.. بروايح الفُله
دا انا كل أملاكى.. شباك عليه قُلة
ومشيت فى بستانك.. إنسان معاه بستان
بصيت لفستانك.. شفت القمر نعسان
ولقيتنى مش خايف.. من أى شيئ زايف
ياما نفسى أملاكى.. بروايح الفُلة
دا انا كل أملاكى..شباك عليه قُلة
على فين ما هاتروحى.. لازم معاكى أطير
ما تحيريش روحى.. وتطيِّرى العصافير
وكفايه جرح زمان.. فى مملكة نسيان
ياما نفسى أملاكى.. بروايح الفُلة
دا انا كل أملاكى..شباك عليه قُلة
أيوه انزلى تانى.. يا ليلى للمجنون
فى البعد هاتعانى.. ملكة جمال الكون
يا اللى انتى ست الناس.. وام الوتر حساس
ياما نفسى أملاكى.. بروايح الفُلة
دا انا كل أملاكى.. شباك عليه قُلة
مستغربه جدا.. أنا غنوتى مَهرك
لما الديوك تدن.. هاتوضى من نهرك
وارجع أغنيلك.. وارتاح على نيلك
ياما نفسى أملاكى.. بروايح الفُلة
دا انا كل أملاكى.. شباك عليه قُلة
تكلمت بعدها مع عشرات الملحنين الذين تعاملوا مع (منير) وقدموا له أشهر وأنجح أعماله فقالوا لي بالإجماع: (منير معجب بأبو حفيظة الذي يلحن ويكتب له ويتصور معه) ومع ذلك كنت قد أرسلت لـ (منير) أغنيه من أجمل ما كتبت، وبعد تصرفاته الأخيرة تأكدت أن الأغنيه لن يضعها في ألبومه الجديد خصوصا بعد نشر مذكراتي معه في (شهريار النجوم) والأغنيه تقول:
راح لحبيبته.. مالقاش حاجة
راح البحر.. ومالقاش موجة
واما الحزن في قلبه اتضفر..
ولا قادر في الدنيا يكون..
حط إيديه في جيوبه وصفر..
وكأنه في الهوي شمشون
……………………………
راحل.. ساحل يقدر ياخده..
ساحل تاني في لحظة يجيبه
أوقات تبقي دموع على خده..
ليلة بيبقي في حضن حبيبه
بس الديك على سطحه هايدن
والأيام هاتكون الأحسن
واما الحزن في قلبه اتضفر
ولا قادر في الدنيا يكون
حط إيديه في جيوبه وصفر
وكأنه في الهوي شمشون
……………………………
ٱه يا ليالي التوهة يا غادرة..
ليه أيامك صبحت حادقة
زي رياح طول عمرك قادرة..
تطفي شموس الروح بالفرقة
خفي الحمل على اللي يعيشوا
ماتعريش عصفور من ريشه
واما الحزن في قلبه اتضفر
ولا قادر في الدنيا يكون
حط إيديه في جيوبه وصفر
و كأنه في الهوي شمشون
……………………………
شايل كل حمولته وماشي..
جوه القلب الصافي مراره
اللي مسافر راح وماجاشي..
خلي الشارع يصبح حارة
لو هايقولوا كسير ما حصلشي
واللي هاييجي عليه ماوصلشي
واما الحزن في قلبه اتضفر
ولا قادر في الدنيا يكون
حط إيديه في جيوبه وصفر
و كأنه في الهوي شمشون
……………………………
حاطط ليه يدك علي خدك..
بعد العمر ما فارق عشك
ألف خريف دايس على وردك..
و الأوجاع بتشاركك فرشك
بس غناك عصفور الحتة
راجل صافي ونظرك ستة
واما الحزن في قلبه اتضفر
ولا قادر في الدنيا يكون
حط إيديه في جيوبه وصفر
وكأنه في الهوي شمشون.