كتب : أحمد السماحي
بعد سلسلة من النجوم الذين قامت باستضافتهم الإعلامية (منى عبدالوهاب) من خلال برنامجها (أنا والقناع) الذي يعرض يوميا على قناتي (الحياة) و(CBC)، استضافت خلال الساعات الماضية الإعلامية المثيرة للجدل رضوى الشربيني في حلقة تذاع على جزئين، تحدثت في الجزء الأول عن حياتها الشخصية وتجربة انفصالها وكيف أثرت فيها وفي حياة بناتها، وعن علاقتها بالمجتمع وقناعتها الثابتة والأقنعة التي أسقطها الزمن من على وجهها.
حيث أشارت (رضوى الشربيني) إلى أنها ليست عدوة الرجال، ولكنها عدوة أشباه الرجال المنتشرين في المجتمع قائلة: (أنا جيت في الدنيا بسبب راجل وهو أبويا، وسندي في الدنيا راجل هو أخويا، وطليقي راجل محترم، وبالتالي أنا مش عدوة الرجالة، أنا عدوة أشباه الرجال، ولست عدوة للراجل، اللى بيضرب مراته مينفعش يتقال عليه راجل، واللي بيشغل مراته بالسُخرة، وهو قاعد في بيته مش راجل، واللي بيعشم دي ودي بالجواز وما يوفيش مش راجل).
وأكدت أنها صادفت الحب الحقيقي بعد انفصالها، مشيرة إلي إنها قصة وانتهت قائلة: (قابلت الحب الحقيقي بعد الانفصال ومكنش تعويض عاطفي، وإنما قصة حب حقيقية، ولكنها انتهت وانا مبحبش اتكلم عن القصص اللي انتهت بسبب اننا اتفقنا اننا لا نتفق).
أما عن مواصفات الزوج الذي تتمناه قالت: (لازم يكون راجل قادر، والقدرة هنا بمعنى انه يكون قادر على العفو عند المقدرة عشان مبيصش على أخطائي ولا صغائر الأمور اللي انا بعملها وهيكبر دماغه ومش هيتلككلي ومش هيبص على عيوبي، ولازم يكون قوي، ويشاركني كل أموري ويكون سند وقوته دي تكون معايا مش عليا ولما يقرر انه مش عاوز رضوى الشربيني مبعملش اي حاجة غير انه يجبني ويقولي في وشي انا اسف من قادر أكمل).
وأكلمت وصفها قائلة: (لازم يكون ناجح مقدرش اتجوز راجل مش ناجح، ولا أنا أكون أنجح منه، ويكون عنده طموح ويتقي ربنا في البني آدمين، ومكونش أنا أولهم لكن مامته وباباه، ولازم يكون بيحبني قوي وبيهتم بيا قوي ويعرف يتعامل معايا لأني صعبة، ويكون حنين وطيب ودمه خفيف عشان مقدرش اتجوز راجل دمه تقيل ابداً، ويكون شيك وخفيف في نفسه).
كما قالت الشربيني: (الحياة بعد وفاة أمي اختلفت كتير وبقيت بعيط قوي، والناس واخدة عني صورة المرأة الحديدية اللي من غير مشاعر ولا شعور، وده عكس شخصيتي)، وأَضافت إنها لم تشعر بالوجع عندما امسكت ورقة طلاقها بيدها مؤكده أن رصيدها في بنوك الوجع أكثر بكثير من قسيمة الطلاق حيث قالت عن تجربتها: (اكتشفت نفسي ولقيت إني إنسان مش قابل يعيش العيشة دي، ورصيدي في بنوك الوجع أكثر بكثير من قسيمة طلاق، ومقدرش اعد الاوجاع دي).
وأشارت إلى أن (قسيمة الطلاق مش وجع إنما اللي بتمري بيه في طريقك عشان يوصلك للطلاق هو اللي بيكون وجع، والقسيمة دي بتبقى النتيجة، وانا متوجعتش لما مسكت قسيمة طلاقي في ايدي، ومش في كل الأوقات كلمة إنتي طالق بتوجع، خصوصاً إذا كان عندك قناعة إن الكلمة دي هى دواكي مش وجعك).
جدير بالذكر أن برنامج (أنا والقناع) استضاف خلال الأيام الماضية عدد من النجوم منهم (يسرا، غادة عادل، نيللي كريم، شريف منير، شيماء سيف، محيي إسماعيل، بيومي فؤاد، ريهام عبد الغفور، كريم فهمي، حنان مطاوع، خالد الصاوي، أيمن بهجت قمر)، ومن المقرر أن يحمل البرنامج عدد من المفاجآت خلال الأيام المُقبلة.