بعد حوالي 40 عاما من ظهورها ننشر لأول مرة النص الأصلي لرائعة (أحسن ناس) لداليدا
كتب : أحمد السماحي
استعرضنا في شهر فبراير العام الماضي، حدوتة أغنية (أحسن ناس) التى كتبها بعبقرية شديدة شاعرنا (صلاح جاهين)، ولحنها بعبقرية شديدة أيضا الموسيقار (سمير حبيب)، وقامت بغنائها بوفاء شديد وعذوبة المطربة العالمية (داليدا) بنت شبرا الأصيلة، حكى لنا موسيقار المبدع (سمير حبيب) العام الماضي أدق تفاصيل الأغنية التى كانت في البداية لكلا من (محمد رشدي، ومحمد العزبي، وفاطمة عيد)، وبعد ذلك طمع (حبيب) وسحب الأغنية من هؤلاء وأعطاها لنجوم مرحلة الثمانينات (محمد منير، علاء عبدالخالق، حنان، منى عبدالغني)، وعندما استمع إليها المنتج الكبير (سمير صعب) المسئول عن الشغل العربي لأعمال النجمة العالمية (داليدا) في منطقة الشرق الأوسط، في الاستديو، وكانت تربطه بحبيب علاقة صداقة، فنال إعجابه اللحن والكلمات، وقال له: تحب تعطي هذا اللحن لـ (داليدا)، فسعد (حبيب) جدا وقال له بسرعة : فورا!، فقال له المنتج الشاطر والشباب الموجودين في الاستديو؟! قال له بخفة دم وهو يضحك: معرفهمش!!.
واستمعت (داليدا) بالفعل إلى الأغنية، لكنها رفضت غنائها نظرا لطول مدتها، حيث كانت حوالي 22 دقيقة، لكن (سمير حبيب) ذهب إليها في باريس، وحذف كثير من الكوبليهات والكلمات التى كتبها شاعرنا المبدع (صلاح جاهين)، حتى وصلت مدة الأغنية إلى 6 دقائق.
بحثنا عن الكلمات المحذوفة وبعد طول بحث وجدنا النص الأصلي الرائع لكلمات (أحسن ناس) كما كتبها مبدعها (صلاح جاهين) ولأول مرة في الصحافة المصرية والعربية ننشر نص الكلمات الأولى لأغنية (أحسن ناس)، وننشر معها كلمات الأغنية التى غنتها المطربة العالمية (داليدا) وعليك عزيزي القارئ أن تقارن بين النسختين، وبهذه المناسبة نتمنى أن يقوم أحد مبدعينا في مجال الموسيقى والتلحين بتجميع النص الأصلي، وتلحينه من جديد كاملا، أو أن تعود الأغنية إلى نجومها الأصليين (محمد منير، وحنان ومنى عبدالغني، وعلاء عبدالخالق)، خاصة أنهم مازالوا موجودين بقوة ويتمتعون بالصوت الجميل العذب، ويمكن أن نضيف عليهم (هشام عباس، وإيهاب توفيق، ومحمد محيي) وغيرهم من أصواتنا المصرية الجميلة.
نص أغنية (أحسن ناس) كما غنتها داليدا:
أدينا بندردش، ورانا إيه؟
بنحكي و نفرفش ورانا إيه؟
نحب نتعرف ورانا إيه؟
نحب نتشرف ورانا إيه؟
ومنين يا بلدينا وبلدكوا إيه؟
أحسن ناس، أحسن ناس
سوهاج بلد المواويل
سوهاج برج الزغاليل
سوهاج يا حبيبي يا حبيبي
سوهاج دي عروسة النيل
سوهاج يا بويا عالم شغال
يرخصله المال، رجالة جد و حمل جبال
يا بلدينا، أدينا بندردش
على كوبري بنها يا نور عيني
منديل حبيبي طرف عيني
بعد الفراق والأشواق
جمع الهوا بينه وبيني
على كوبرى بنها، آدينا بندردش
يا إسماعيلية يا إسماعيلية
أحب أزورك في المغربية
أركب فلوكة أنا وحبايبي
و نغني غنوة ع السمسمية
آه يا لالالي حبيبي يالالالي
يا روحي يا لالالي أدينا بندردش
ع المحلة منين، يا سمنودي
ع المحلة منين، أرض جدودي
ع المحلة منين، آه يا شن و رن
ع المحلة منين، يا سمنودي
آدينا بندردش ورانا أيه؟
إسكندرية أحسن ناس، ع البحر ماشية تتمختر
من سيدي بشر لأبو العباس، أيوه يا عالم ع المنظر
أيوه يا عالم ع المينا، و الشوق بيتمرجح بينا
و تلتميت ألف سفينة، ع البحر ماشية بتزمر
يا نقرزان حيي الجدعان، حي العرايس و العرسان
محروسة م الإنس و م الجان
يا حلوة يا أم التوب الأخضر
أما أنا أنا من شبرا
في مصر وأولادها الطعمين
زي القمر بعيون سمرا
لابسين عقود فل و ياسمين
والنيل بيضحك و يغني
فاكرني و بيسأل عني
أروحله ألاقاه مستني
وجنب منه أحسن ناس
……………………………………………………………………
نص أغنية (أحسن ناس) كما كتبها عبقري مصري (صلاح جاهين) :
أدينا بندردش، ورانا إيه؟
بنحكي و نفرفش ورانا إيه؟
نحب نتعرف ورانا إيه؟
نحب نتشرف ورانا إيه؟
ومنين يا بلدينا وبلدكوا إيه؟
أحسن ناس، أحسن ناس
سوهاج بلد المواويل
سوهاج برج الزغاليل
سوهاج يا حبيبي يا حبيبي
سوهاج دي عروسة النيل
سوهاج يا بويا عالم شغال
يرخصله المال، رجالة جد وحمل جبال
يا بلدينا، أدينا بندردش
بنها العسل يا جمال بنها
شبابيكها عسلي وبيبانها
والقشطة ست سبع قراريط
على كل كيلو في لبنها
يا بلدينا بلدك دي بنها
قشطة وعسل
على كوبري بنها نعم أيوه
الحلو قابلني نعم أيوه
منديله اسم الله طرف عيني
يا خواتي كده على سهوة
كل ده من لعب الهوا بينا
واحنا ماشيين مع بعضينا
على كوبري بنها يا بلدينا
قشطة وعسل، وادينا بندردش
أحسن ناس
ع المحله منين يا سمنودي
ع المحله منين أيوه قولولي
ع الملحه منين ع المحله منين
ع المحله منين يا شن ورن
يا سمنودي يا بلدينا آه يا شن ورن
اسماعيلاوي والا منياوي
والا قليوبي ولا صلحاوي
ولا منصوري والا دهشوري
ولا بهجوري ولا بيباوي
ولا سنباطي ولا دمياطي
ولا عياطي ولا جرجاوي
قول يا نور العين وادي لك ريالين
ع الملحه منين يا بلدينا
آه يا شن ورن
المحلاوي زرع وتقاوي
ما في على طقسه سيما ورضاوي
لما نتصافى فيش كده لطافه
لبس وقيافه رقص وغناوي
فتلة من نولي فتلة من نوله
قولي على قوله يعجب الغاوي
بس داره فين، أحمر الخدين
المحله منين يا بلدينا
آه يا شن ورن وادينا بندردش ورانا ايه
أحسن ناس
أسوان بنت السلطان، أم الدهب الرنان
والنيل فايت بيغني، أنا مصر وأنا السودان
يا بلدينا، ياللي بلادك أسوان
الكركاديه الأحمر في السبت الخوص الأصفر
والبلح العمري السكر، اللي بناكله في رمضان
كل ده يبقى أسوان يا بلدينا، وأدينا بندردش
حلو اللون الخروبي، لونك إنت يا محبوبي
والفن الشعبي العالي كمان، كل دي يبقى أسوان
يا بلدينا، أسوان بنت السلطان وأدينا بندردش
انزل من الطيارة، وخد الغنواي زيارة
للأهل وجارة الجارة، والقسطل وأدندن
ولكل بلاد أسوان يا بلدينا
أسوان بنت السلطان أم الدهب الرنان
وأدينا بندردش ورانا ايه؟ أحسن ناس
إسكندريه، أحسن ناس، ع البحر ماشيه تتمخطر
من سيدي بشر لابوالعباس، أيوه يا عالم ع المنظر
يا بلدينا اسكندريه أحسن ناس
يا ميت حلاوه على المينا، والشوق بيتمرجح بينا
وتلتميت ألف سفينه، في البحر واقفه بتستنظر
يا بلدينا اسكندريه أحسن ناس
عمال صناعة اتنين مليون، تجار تلات تربع مليون
ومصيفين كده سمر اللون، على قد رزقها مش أكتر
يا بلدينا اسكندريه أحسن ناس
يا نقرزان حي الجدعان، حيي العرايس والعرسان
محروسه م الأنس، وم الجان
أم العيون أزرق في أخضر
يابلدينا إسكندريه أحسن ناس
وأدينا بندردش
ومنين يا بلدينا وبلدكوا إيه
جمهورية مصر العربيه
أحسن ناس.
