بقلم النجمة الكبيرة : فريدة سيف النصر
الله حي التاني جاي .. كلمة حربية اللي مربية نينا.. ومرت أيام والأسبوع بتاع سعيد وشهور والبيت ابتدا يبقي فيه صوت وصريخ سعدة.. أبويا كان يقول له ايه ياسعدة الزيطه دي.. وطبعا أنا المسؤوله عن حضرته ونينا فاطمه بتعمل شغل البيت هي والست حربية أطيب ست في الدنيا.. علي فكره وده كلام ووصف لوزة.. أم فريدة بعدين مستقبلا.. أم كامل ماكانش عندها كامل ولا اتجوزت من أصله ده اسم أخوها اللي ربته هى.. كانت قصيرة أوي ومخيفة ووشها منحوت جميل.. أنف فرعوني كده وعيون واسعه متكحله تعلي طول وعافية ونظيفة وأكلها تحفة وتحافظ على رشاقتها يادوب تدوق الأكل وتقول: على لساني ولاتنساني.. كل كلامها أمثال.. كانت مابين الشقتين اللي مفتوح بيبانهم علي طول.. الدنيا كانت أمان والناس حلوه.
وتتنهد لوزة الكبيره أمي وتكمل وترجع نظراتها طفلة حزينة ولا فرحانة متعرفش بس بنحبهم بجد.. وقالت لوزة: طبيعي أبويا بعد ماكان يدخل يبوسني ويسألني عملتي ايه يالوزة مع نينا النهاردهة بقي يدخل علي سعيد على طول فا أنا بقيت أستني على ميعاد أبويا واقعد جنب سعيد علشان أقول له أنا أهو ويبوسني برضه مانفعش.. أبويا مابقاش شايف حتي نينة.. والحقيقه أنا كمان واقعة ففي غرام أخويا اللي حسيت أنه ابني.. أنا باغيرله أنا باديله الرضاعة.. أنا بالاعبه.. بحبك يا اخويا أوي.. بس بقي زعلت لما لقيت أبويا بيقول لنينة عاملة غدا ايه يا أم سعيد.. قولت له لأن أنا الأول نينا أم لوزة.. ردت هى طبعا ياغالية أنتي أول حب وفرحه ليا.. انتي بنتي أنا مش محمد أفندي لوحده.
ورد أبويا وقال طبعا بس علشان تبقي عارفة وانتي كبرتي أهو إن لما الناس تنده للست لازم تقول اسم راجل ياأم فلان زي أم كامل كده وأم فاطمه ما هي ماعندهاش ولاد، لكن بيقولوا لها يا أم حسن على اسم جوزها فهمتي يالوزة ونينا تبقي أم سعيد.. قولت له لأن أنا أم سعيد.. أنا اللي باشيله وأغير له وأرضعه اللبن وكمان أأكله والعب معاه وانيمه.. نينا كلمته ليه بقي.. ضحكوا كلهم وقال لي ماشي لما تكبري هانقوللك يا أم محمد اسم الوكيل أهو.. لوزه قالت ماشي.. ومرت أيام حلوة لكن نينا كانت تعبانه أوي وتدوخ وتنام كتير ومافيش لقمه تستني في بطنها.. أمها قالت لها انتي حامل تاني يافاطنه أنا اتسمرت مكاني يعني ايه أنا مش عارفه أنا وسعيد بس ياتري اللي جاي بنت ولا ولد.. لقيت أمها بتقول.. إلهي يطعمك ببنت وتحتوي سعيد وكفايه كده.
ردت نينا فاطمة ما سعيد عنده أخت أهي قمر لوزة.. وكأنه نينا حست بيا الكلمة بتاعت الست والدتها حسستوني اني غريبه وبصراحه دمعت ورحت حاطة سعيد جنبها عالسرير وجايه أطلع سعيد قعد يعيط.. نسيت أقول لكم ماكانش يسكت إلا معايا.. أم نينا فاطمة قالت لي يخيبك يادي البت انتي بتعرفي تتقمصي يالوزة يقطعني ما اقصدش تعالي خدي أخوكي.. رديت وكأني ست كبيره زيهم مش أنا قولت لكم قعدتي معاهم ومافيش حد ألعب معاه قدي خللتني زي مابيقولولي لوزة بقت قرشانة.. بس أنا مش كده .. أنا باحس وافهم وآخد علي خاطري ماهي أمها خللتني مش في الحسبه بنت وتبقي أخت لسعيد أومال أنا ايه.
المهم قولت لها لأ أنا مش هاشيل حد استني لما تجيله اخت وتشيله.. وخرجت وأول مره احس انه لأن لازم ارجع اخده ..ده بيعيط جامد علشاني وأنا بحبه زي ماهو بيحبني.. رجعت وحدته منهم ماسكتش مع ولا حد منهم نينا وأمها وحربيه.. أول ماخدته حبيبي سكت وضحك.. أنا بقيت متأكده إن سعيد هايبقي أخويا وابني وصاحبي.. ورجع أبويا وعرف وجاب حكيم وأكد له وفرح وقال ياما انت كريم يارب .. لوزة مش هاتبقي لوحدها في الدنيا دي.. كلمتك حلوه يابابا.. والأيام زي الزئبق بتتسرسب هوا.. ده كلام لوزة بالحرف علشان كده مابغيرش طريقته ولا كلماته.. وزحف سعيد وبعدين بقيت اسنده وبقي يمشي سعيد من ساعة ما مشي والدنيا زاطت ولا حاجه بقت في مكانها وأنا أجري وراه واضحك ياحبيبي ياخويا أول مرة أفرح كده باللعب مع سعيد.. ضحكته حلوة وكان أطول من اللي في سنه.. والغريب أن أي برتقاله أو كورة صوف أي حاجه مدورة يشبط فيها سبحان الله.. وأول كلمه نطقها (أوزة).. وكلهم غاروا.
مرت الشهور بسرعه حواليها أحداث مش هطول عليكم.. وجه يوم الولادة بسرعة أوي.. نينا كانت تعبانة خالص وندهتني وقالت لي اسمعي يالوزو: انتي عارفه أنا بحبك قد ايه انتي البنت اللي خلفها قلبي.. وحضنتني وعيطت.. وانا خوفت عليها ماعرفش ليه.. وقالت لي أنا عارفة انك بتحبي سعيد أوي وهو كمان متعلق بيكي.. اوعديني تحبي اللي جاي كمان حتي لو بنت أكيد هاتحبك علشان انتي حنونة يالوزه وخالي بالك منهم لو جرالي حاجه.. أنا ماحسيتش غير بدموعي نازلة زي المطر وقولت لها لأه يانينا اللي جاي مش هايبقي زيي أنا ربنا بعتك ليا هما ما اعرفش بعت لهم مين.. علشان خاطرنا والنبي تقومي وترجعي لنا.. وعيطنا علي نينا ودخلوا الستات وطلعوني بره وانا حضنت سعيد وقعدت عالأرض أدعي من قلبي يااااااارب بلاش نينا يارب علشان أبويا وعلشانا سيبهالنا…ياتري الأيام مخليه ايه يالوزة ليكم.. الله أعلم.