لوزة حماة أبوها .. !

بقلم النجمة الكبيرة : فريدة سيف النصر

ويارب ياساتر (كلمة أبويا ويكحكح عالسلم) .. وأنا طالعة عيني علي شقة حبيبتي الله يمسيها بالخير ويسعدها مع جوزها ومش عايزه أبص عاللي طلعوا كلهم علي صوت أبويا.. وألف خطوه عزيزه ياسي محمد أفندي ونورتنا وشرفتنا ووحشتينا يالوزة والحاجه اتاخدت هوا من ايدينا.. وطبعا كله جاب مرات أبويا من فوق لتحت فرجه يعني وكشف.. ودخلنا وأنا أول واحده اتكلمت.. مرات أبويا الحلوة.. دي مرات أبويا..

(س) قالت وهو كان في أجمل من أمك لكن بركة انك حباها يارب تطلعي عند حسن ظن لوزة يادلعدي ست فاطنه.. أصل زمان لازم يقولوا دلعدي كأنه لقب وفاطمة يقولوا فاطنه معرفش ليه؟.. المهم خالة (س): ايه اللي معاكي ده يالوزة سبحان الله عايزه تاخد كل حاجة..ق ولت لها جايباه لبنتك أصل من يوم ما اخدته مالبستوش.. أبويا قاللي ماتلبسيش حاجه حد لبسها..أخ أنا كذبت وراح أبويا شاخط فيا.. ايه الكلام ده يالوزة عيب كده دوول اخواتك عيب وزعل..

ردت (بطة) زي ماستي كانت بتدلعها وقالت.. ماتقصدش حاجه هى بطبيعتها لوزة بتحب الناس كلها.. وبعدين دي جايباهولها لحد عندها هدية.. أبويا ماردش هو أصلا قليل كلام أوي.. بيني وبينكم حسيت إني ليا صاحبة أو أخت..(س) قالت ندخل في الموضوع بقي نصيب أم لوزة الله يرحمها.. في البيت ده وبيت بحري وحته أرض.. يبقوا بتوع لوزة وانت الوصي عليها واحنا عايزين نبيع وهاناخد في سابا باشا وكل واحد ياخد في مكان مايريحه من اخواتي.. لكن حق الله لازم نديكم نصيب لوزة.. بس لما تكبر يعني يفضل معايا اشغلهولها وتاخده في وقته..

أبويا قال أنا مش عايز حاجه.. ردت (فاطنه) اسمحولي أتدخل أبويا قال طبعا ماانتي في مقام أمها.. ردت (س) اسم الله علي مقامك انت مافيش حد في مقام حد.. اتفضلي نسمع.. (فاطمه) قالت: ليه مانحطش للوزة نصيبها من دلوقتي في البوسته أو البنك وهى لما تكبر كلها كام سنة تاخدهم كده أضمن ماحدش يضمن حياته ياست (س) وكمان لا هيا ولاغيرها هايقدر ياخد منهم حاجة.. أنا حسيت إنها قلبها عليا وهى بتتكلم وحاطه ايدها علي ايدي.. وخالة (س) عينيها بتطق شرار وقالت لاه أنا خالتها وأدري بمصلحتها واللي عنده كلمه يلمها قال ياقاعدين يكفيكم شر اللي جايين..

أبويا راح واقف وقال لحد كده وكفاية واللي فاطمه قالته عداها فيه العيب.. أنا هابعت المحامي بالورق وانتي بورقك وتشوفوا حق لوزة ايه وتوضعوه بمعرفة المحامي بإسمها.. وكتر ألف خيرك وشكرا عالضيافة ياللا ياستات.. الله أنا ستات قمنا مع بعض.. وابويا كان جايب لفات كتير حلو خدت علبة الهريسه أصلي باموت فيها.. أبويا قاللي عيب يالوزه.. قولت له نفسي فيها وفي علب لهم ياما أهي ..

فاطمه ضحكت و(س) قالت كده برضه مش هاتبوسيني ولا تباتي معايا النهارده..أنا رديت وقولت أصل ماقدرش أسيب ابويا ونينا لوحدهم وكمان هانشتروا مايوه علشان هاينزلوني البحر مش كده يانينا.. (س) هى بقت نينا مبروك ياختي انزلي البحر وماله مانتي مانزلتهوش معانا مابتنسيش يالوزة تارك مابيباتش.. مشينا الحمدلله ولا في مايوه ولاغيره بس قولت كده.. وفي الحنطور أكلت هريسه واديت ابويا حته ومعرفش ليه اديت لفاطمه في بوءها.. ولقيتها بتقوللي أحلي كلمة نينا سمعتها في الدنيا – على فكرة زمان نينا تتقال للأم برضه، لكن أنا مش قادره أقول ياماما..

وعدي الأسبوع أحلي أيام في الدنيا فاطمة جابت لي مايوه فعلا ونزلنا البحر أنا وأبويا وهى أول ماطلعت لفتني بسرعه ونشفتني ولبستني معرفش ليه عيطت قالتلي مالك حضنتها وبس.. روحنا كل حته حتي السينما.. الرحلة دي خللتني أنا وفاطمه حد واحد.. انبسطت وكنت طايره حسيت ان ربنا بقي يحبني.. (أختصر حاجااااااات كتير لكن اللي جاي حواديته أكتر من حياة (لوزة اللوز قلبي) ..

رجعنا مصر بحلويات وحاجات كتير دخلت علي أوضتي جري وقولت ياستي وحشتيني أنا مبسوطه أوي وفتحت الأكياس بتاعتي.. الغوايش وتوك الشعر وبرنيطة ومايوه ونضارة ولبس جديد وكولونيا ليا.. فاطمه راحت لأمها توديلها الحلو وأبويا فتح ودخل الحمام وجت فاطمه قالت ياسي محمد أبويا عايزك وياللا يالوزه هانتعشي معاهم (أم كامل) عامله ورقة بطاطس باللحمه اللي بتحبيها.. قولت لها قصدك حربيه فضحكت أنا كمان حبيت حربيه.. فاطمة عيونها حلوة كلها طيبه أنا يا إما أحب العين أو أخاف منها..

نينا بقت حبي.. مسكت ايدها ودخلت معاها بقيت باحب امسك فيها.. واتعشينا وبقيت أقوم أحضر وأشيل حسيت بحريه غريبه مش زي ماكنت باقعد زي الضيوف.. أيوه دوول أهلي الجداد بس لو ستي تكون موجوده يبقي أحلي.. أبويا شرب الشاي بعد العشا في أوضة أبوها مع بعض وطلع يقوللها مبروك ابوكي كتب المحل باسمي واسمك واحنا مسافرين.. دخلت له جري ليه كده ياحبيبي ربنا يخلليك ليا بابا آبا رد عليا باباااااااا وصوتت أبويا وأمها جريوا عليها وأنا اتسمرت في مكاني وحربيه حاضناني.. هو ليه في موت ويعني ايه ناس تمشي مانشوفهاش تاني بيروحوا فين.. أسألة لوزه لنفسها..