* أكتسبت من الفن ذبحة صدرية وثلاث جلطات وانسداد في الشرايين وتضخم في الكبد والقلب
* أكره الكذب والنفاق والخيانة، وأحب فني ووطني والمرأة
* أوصي كل الناس بالحب والبعد عن الكره لأنه يسبب تعاسة في القلب ومنغصات وضغائن!
* أصعب حرمان عشته هو حرماني من أختي (أسمهان) ويوم أن ماتت نص حياتي انتهت!
* أم كلثوم محبتنيش وتواضعت وجرحت نفسي حتى تغني لحن من ألحاني لكنها رفضت
أعده للنشر : أحمد السماحي
كان فريد الأطرش يصوغ موسيقاه، كما يصوغ الشاعر قصائده بالوحى والإلهام، فهى ليست نتيجة تعليم أو دراسة لأنه لم يدرس الموسيقى دراسة منتظمة، وإنما أخذها بالفطرة والموهبة التى ولدت معه، فوجد نفسه منذ الصغر يغني ويسرق عود والدته ليعزف عليه من ورائها، عشق الموسيقى فعشقته، لهذا كان يحز فى نفسه ألا تغني له كوكب الشرق أم كلثوم، وفى هذا الحوار الإذاعي الذى أجراه مع الإذاعة السورية عام 1973 شكا وصرخ لعدم تعاونه مع كوكب الشرق، وغيرها من الأسرار التى تتعلق بـ (فريد الأطرش)، فإليكم نص الحوار الذى تركناه باللهجة العامية حتى تصل صرخة مطربنا كما هى، خاصة أنه يعتبر من آخر حوارته الإذاعية قبل الرحيل.
* ماذا اكتسبت من الفن بعد هذا الزمن الطويل وهذا العطاء المميز؟
** يضحك : خرجت بذبحة صدرية، وثلاث جلطات، وانسداد في الشرايين، وتضخم في الكبد، والقلب، وبلاوي أخرى ومنغصات في الحياة.
* الحياة مليئة بالمفارقات الغريبة فيها سعادة بؤس وشقاء وملذات أذكر لنا ثلاثة أشياء تكرهها في الحياة؟
** أولا الكذب، ثانيا النفاق (يا ساتر على النفاق)، وثالثا الخيانة خيانة صديق، لما الغريب يخونك دا بتسميه طعنة!، ولكن لما الصديق يخونك ويطعنك دي بتوجع أكثر، بتوجع لأنها بتفضل في النفس تعذب القلب، فهؤلاء هم اللي بكرهم في الدنيا.
* وثلاثة أشياء بتحبها؟
** أحب الموسيقى أولاً لأن دي حياتي، طبعا فيه ناس بيقولك أنا بحب وطني، طبعا أي إنسان عنده شهامة وكرامة بيحب وطنه أولا دا شي ضروري، فأنا بحب فني ووطني وبحب المرأة، مش عيب لما أحب المرأة، واستمد من شفاه حلوة، ولا عنين حلوة، ولا جسم ممشوق، استمد منها وحي فني، الحب في نظري شيء من الله.
* كم مرة حبيت أستاذ فريد؟
** ما أنت عارف والمستمعين عارفين (يضحك).
* طيب أعطينا العدد ومش هنقول أسماء؟
** ربنا أوصى بالحب، ووضع لنا قلوب عشان نحب ونتحب، فأنا بوصي كل الناس إنهم يحبوا بعض وما يكرهوش بعض، لأن الكره دا بيسبب تعاسة في القلب ومنغصات وضغائن، ويكون في جسد الإنسان شي ما يدعوه للانتقام فربنا أوصانا بالحب.
* كمان ما جاوبتني كم مرة حبيت في حياتك؟
** أنا اقول إن دي حاجات خاصة!، وبلاش عشان ما يفتكرش الجمهور إني فاسق (يضحك)، وفيه أشياء كتيرة الواحد يقدر يعشق فيها، منها الطبيعة، وكمان الطبيخ!، يا سلام على الطبيخ وخصوصا لو كانت (مجدرة) يضحك بقوة، الحب فيه حاجات كتيرة لذيذة وشاعرية وتبعث الراحة والطمأنينة للنفس وبتوحي للشعراء والملحنين أمثالي واحنا بنقدم كل هذا للجماهير ولفننا فأنا بآخذ ابتسامة حلوة وأبلورها في لحن جميل فأي غضاضة في هذا الأمر.
* بالنسبة للحب أستاذ فريد كم مرة إنت عشت في حرمان وأنتجت شي في الحرمان؟
** والله أنا أصعب حرمان عشته هو حرماني من أختي (أسمهان)، يوم ما ماتت يمكن نص حياتي انتهت، لأنها كانت كل شيء في حياتي، وأنا وهى كنا نحب بعض حب لا يمكن أن يتخيله إنسان، فهي كانت صديقتي وأختي وحبيبتي وكل شي، والصوت الي كنت باديله أجمل ألحاني، وكان من السهل علي لو فقدت عين من عنيه أورجل أوايد مني على إني أفقد (أسمهان)، مالقتش بعدها صوت يؤدي ألحاني، صوتها مش بس صوت، وكمان شخصية.
لأن الفنان لابد يكون عنده صوت وشخصية!، فيه كتير من الأصوات جميلة جدا في الشرق لكن تنقصها الشخصية! والفنان إلي عنده شخصية بيوصل حتما للناس بأي شكل كان، فأسمهان كان لديها شخصية جبارة، وكانت فنانة جبارة، وصوت عظيم، ومن يومها مالقتش صوت أحسن منها،عشان كدا أنا ما بلحنش دي الوقتي، ومفيش في هذا الوقت صوت أقدر أديه ألحاني إلا السيدة أم كلثوم.
وأم كلثوم بكل أسف فيه حاجة في نفسها مش عايزة تتعاون معايا يعني أنا مش مضطر إني أقول الكلام دا، بس أنا حاولت معاها وقلت هذه أمنيتي في حياتي، وتواضعت، وحتى جرحت نفسي لما أقول هذه أمنيتي لأني مش محتاج لكل ده، بس أنا حبيت أوري الناس أد إيه أنا بتعذب، والناس عارفة قيمتي الفنية، وعارفة إني أقدر أقدم أكثر مما قدموا لها في حياتها الفنية.
* يا ترى ما هي الأسباب؟
** والله حاجات كامنة في نفسها أنا مش قادر أتكلم فيها لأنها جارحة شوية، وأنا مبحبش أتكلم عن السيدة “أم كلثوم” وأقول الي في نفسيتها لأن هى بتكرهنا، ومبتحبناش، وأبسط دليل على ذلك، إحجامها عن كونها تغني من ألحاني، هية مش مضطرة أول حاجة، وأنا مش بفرض عليها، بس هيه تقدر تسمع من ألحاني وتقول مش حلوين، طب مين يحكم بيني وبينها ؟! طبعاً الجمهور، مش عايزة تديني الفرصة دي، كل ما تسمع مني حاجة تقول: (لا) أنا فريد أنا بعزه، أنا بحبه، أنا بقدره، طب تفضلي تعالي نتعاون مع بعض قدمت لها قصيدة للأخطل الصغير عن ثورة فلسطين بعنوان (وردة من دمنا)، وأنا أعتقد أنها لو غنتها أم كلثوم كان الناس حتحبها أكثر من أي أغنية حب.
سمعتها أم كلثوم واتجننت عليها وقالت عايزة أغنيها بكره، وبعد أربع خمسة أيام غيرت فكرها، فإذن فيه شيء كامن في نفسها مش عارف أنا هوه إيه؟، أنا باعتقد إنه إذا كان فيه شي ضد أسمهان فأنا ورثت هذا الكره، فأنا مش عارف ليه هيه مش عايزة تغنيلي مع إنك لما تسألها تقولك: (لا دا فنان عظيم ومش عارف إيه)، أروح أقدم لها ألحان رائعة مش عايزة تغنيلي، هية تقدر تقولك والله فريد قدملي لحن معجبنيش، مش من حقها لأن الملحنين الكبار مثل السنباطي، عبدالوهاب مش هيةه إللي تحكم على ألحانهم الجمهور الي بيقول دا فاشل ودا ناجح، وكل الألحان إللي قدمت لأم كلثوم مش كلها ناجحة، لا أعتقد أن كل ما قدم لها في مستوى صوتها وأنا بسمع لها ألحان تقدمها أدنى بكثير من مستوى أم كلثوم.
والله مقدرش أحدد لأنهم كلهم كويسين وأخواتي وزملائي، لكن أنا فكري أن أم كلثوم لازم كانت تعتزل يوم ما قالت: أنا حعتزل يوم ما مات جمال عبدالناصرأنا مش حغني تاني، وكانت قدمت (الأطلال) ودي أروع قصائد قدمتها وبعد كدا ما قدمتش ألحان يعني في مستوى الإطلال.
أنا عايز أسألك انته وأسأل الجمهور هل أم كلثوم بعد (الأطلال، وأنت عمري) قدمت حاجة زيهم؟ فبعد كدا ابتدت تغني طقاطيق وحاجات صغيرة كدا خفيفة تؤديها أي مطربة مش ضروري أم كلثوم، فإذن الكبر والسن لما يتقدم بالفنان لازم يعترف انه انتهى، لازم تعتزل وهى كبيرة، أنا بحب صوت (أم كلثوم) سيبك من الحاجات الخاصة إللي بيني وبينها، أنا طبعا باقدرها كأكبر مطربة جت في تاريخ الغناء العربي، وأنا ماسمعتش أغنيات أيام زمان عشان أحكم عليهم، لكن في عصرنا هذا أم كلثوم أجمل وأروع صوت جاء في الشرق، فإذن هذه الفنانة الكبيرة العظيمة لازم تعتزل وهى عظيمة مش تعتزل بعد أن تنهار وصوتها يضعف ويبتدي الناس ينتقدوها ويقولوا لها صوتك ضعف.
وإحنا بنقول إن صوتك ضعف جدا، وأصبح مستواه لا يمكنه أن يؤدي الألحان القوية الدسمة والانطلاق والطبقات العالية والصدر المنفتح والنفس الطويل وأداء القصائد والألحان الرائعة الكبيرة، فأصبحت هى لا تقدر أن تؤدي هذه الألوان العظيمة كما كانت تؤديه في السابق، فإذن لماذا الاستمرار، والإصرارعلى أن أنهي حياتي وأنا عايش؟! كلامي هذا يجوز البعض يأخذه ضدي ويوصله للست بس أنا مسؤول عن كلامي.
* لكن هذه مشكلة في العالم كله فالفنان لا يعرف متى يعتزل؟
** أنا أحترم بعض الشخصيات التي اعتزلت وهي في أوج مجدها فهناك من الفنانين من اعتزل وعمره خمسة وخمسون يعني من عمري، فأنا لسه عندي عطاء، والدليل إني عملت حفلة السنة اللي فاتت وغنيت (عش أنت إني مت بعدك) للأخطل الصغير، ونجحت نجاحا منقطع النظير، وكان صوتي بيؤدي أحسن مما أديت في شبابي، فإذن أنا لوحسيت وأنا فريد الأطرش اللي الجمهور العربي وصلني للمكانة الرفيعة اللي أنا عليها لا يمكن إني أفقدها في لحظات جنون أو خبل أو غرور وأفقد كل حياتي وكل ماضية وأروح وأغني وحش قدام الناس وانزل لمستوى اوطى من المستوى إللي أنا وصلت إليه لازم أعتزل وأنا كبير وأفضل في نظر الناس كبير زي الملاكم الي يعتزل وهوه بطل العالم.
* من هو الذي سيوصل هذا الكلام للسيدة أم كلثوم؟
** أدي الإذاعة أهية، وأدي الناس أهم، وأكيد فيه ناس حيسمعوها ضروري لأنه فيه ناس حاسدين وحقودين ومنافقين ويروحوا يقولولها شوفي فريد أطرش بيقول إيه! أنا بقول عنها إنها أعظم امرأة في الشرق فلما بقول عنها كذا لأن بقالي أربع خمس سنوات أترجاها وأرجوها انها تغني لي قصيدة قدمتها لثورة فلسطين يعني حاجة وطنية حتى لو وحش كان لازم تغنيه وبعدين الجمهور هوة اللي حيحكم عليه.
أنا جيت وبقدم فني على كفي وماضيه كله، وبما عرف عن فريد الأطرش بكل تواضع من اختيار مواضيع أغانيه الجميلة والكلمات الجيدة والألحان الي باقدمها والحمد لله كل الناس راضية عنها، وأنا مستوايا كل الناس تعترف لي بيه وكل الناس بتعرفه هوه إيه، إذن فأنا مش الفنان إللي هاجي وأعرض اسمي ومكانتي وماضية دا كله للزوال عشان يقولوا فريد الأطرش قدم لحن وحش لأم كلثوم، فأنا طبعا إذا قدمت لحن لأم كلثوم أنا عارف باقدم إيه، باقدم شيء خطير يتناسب مع مستواى أنا أفني ومع ألحني ومع ماضيه كله ومع تقدير الناس ليه ومع صوت أم كلثوم فإذن كل هذه الأشياء تخليني أفكر ميت مرة في اللحن، وأغير فيه لحد ما الاقيه مكتمل، والدليل لما سمعته أول مرة كادت أن تجن والله، والله والله العظيم والقرآن الكريم كادت أن تصعق من كثر ما هى تأثرت باللحن وقالت لي إمتى حغنيه؟ الجمعة دي وحنعمل بروفة بكرة وتحمست حماس مالوش نهاية، وبعد أيام الزن في الودان فبيزنوا في ودانها وبيبقولوا لها يا شيخة دي أغنية وطنية وحقيقة معرفش قالو لها إيه؟
ومعرفش هل دا صادر منها؟ ولا نابع من الناس الحاسدين إللي مش عاوزيني أوصل لأم كلثوم؟! وحقول وأعترف لأول مرة بالسبب الوجيه إللي مش عايزين الناس تتعرف عليه ومش عاوزيني أوصل لأم كلثوم لأنه حيحصل مقارنات بيني وبينهم، حيقارنوا بين الألحان التي قدموها لها واللحن إللي أنا عملته ليها فيحصل مقارنات أيهما أصلح وأيهما الأحسن فإذا أنا كان لحني فاشل حيقولوا عملها إيه فريد الأطرش ماعملهاش حاجة وحفشل أنا، لأن صوت أم كلثوم مش هوه اللي حيفشل الملحن إللي يفشل مع صوت أم كلثوم، اللحن لما يكون وحش وضعيف هوه اللحن اللي بيسقط مابتغنهوش تاني لكن صوتها بيفضل عظيم، وتفضل أم كلثوم ومش ممكن تفشل اللي بيفشل الملحن اللي معاها.
ولو نجح لحني حتحصل مقارنات والناس حتقول آه دا أحسن من السابقين فالحاجة دي حتأثر على سمعة ومكانة الآخرين اللي بيلحنوا لأم كلثوم لازم يبعدوني عنها عشان متحصلش هذه المقارنة.